کورونا کی وجہ سے ویران سینما گھروں میں پچھلی عید الاضحی پر دھوم مچانے والی فلمیں

پاکستان میں کورونا وائرس کی وباء کی وجہ سے امسال عید الاضحی پر سینما گھر بند ہیں اور اس بار کوئی نئی فلم نمائش کیلئے پیش نہیں کی جارہی تاہم گزشتہ سال عید الاضحی پر نمائش کیلئے پیش کی 3فلموں نے باکس آفس پر بھرپور بزنس کیا اور خوب دھوم مچائی، ان تینوں فلموں کا مختصر تعارف پیش خدمت ہے۔

سپراسٹار

سپر اسٹار کی کہانی اداکاربلال اشرف اورماہرہ خان کی محبت کے گرد گھومتی ہے۔ اس فلم میں عاطف اسلم، زیب ، علی سیٹھی ،شیراز اپل اوربھارتی گلوکارہ سنیدھی چوہان نے اپنی آواز کا جادو جگایا اور ماہرہ خان اور بلال اشرف کی اداکاری نے اس فلم کو چار چاند لگادیئے۔ شائقین کی پسندیدگی کے اعتبار سے یہ فلم گزشتہ عید پر نمبر ون قرار پائی ۔

پرے ہٹ لَو

شہریا ر منور اور مایا علی محبت کی آنکھ مچولی پر مبنی فلم پرے ہٹ لَونے گزشتہ سال عید الاضحی پر شائقین کو اپنے سحر میں جکڑے رکھا اور فلم میں سپر اسٹار ماہرہ خان کا ڈانس نمبرمورے سیاں کے علاوہ میرا اور سونیا جہاں کے رقص نے فلم کی کامیابی میں بھرپور کردار ادا کیا جس کی وجہ سے یہ فلم شائقین کی پسندیدگی میں دوسرا درجہ پانے میں کامیاب رہی۔

ہیر مان جا

حریم فاروق اور علی رحمان خا ن کی محبت، کامیڈی اور جذبات سے مزین اس فلم نے شائقین کو عید الاضحی پر بھرپور تفریح  فراہم کی ، حریم فاروق اور علی رحمان خا ن کی جانداز اداکاری کی وجہ سے یہ فلم پاکستان بھر میں شائقین کی توجہ کا مرکز بن رہی جس کی بدولت اس فلم کو تیسرا درجہ حاصل کرنے میں کامیابی حاصل ہوئی۔