ترک اداکار سے فراڈ کرنیوالا پاکستانی جعلسازٹک ٹاکر کاشف ضمیر پھرگرفتار

لاہور: پولیس نے ترکی کے تاریخی ڈرامہ ارطغرل غازی میں مرکزی کردار ادا کرنے والے معروف اداکار انگین آلتان دوزیاتان سے فراڈ کرنے والے پاکستانی ٹک ٹاکر کو گرفتار کر لیا ہے۔

ٹوبہ ٹیک سنگھ سے تعلق رکھنے والے ٹک ٹاکر کاشف ضمیر کے خلاف ترک اداکار انگین آلتان دوزیاتان کی مدعیت میں نوسربازی کرنے پر تھانہ ریس کورس میں مقدمہ درج کیا گیا جبکہ آئی جی پنجاب کے حکم پر شکایت پر فوری ملزم کو گرفتار کیا گیا۔

مزید پڑھیں:ویڈیوز بناکر خواتین کرہراساں کرنے کے الزام میں یوٹیوبر گرفتار، مقدمہ درج

ترک ایمبیسی کی جانب سے شکایت کا لیٹر محکمہ داخلہ پنجاب کو بھجوایا گیاتھا جس کے مطابق ملزم کاشف ضمیر نے چوہدری گروپ برانڈ کی شوٹنگ کے لئے انگین آلتان دوزیاتان کو پاکستان بلوایا اوریہاں آنے پر کاشف ضمیر کی جانب سے رقم ادا نہ کی گئی ۔

ایف آئی آر کے مطابق انگین آلتان دوزیاتان کی ٹیم کی جانب سے رقم کا تقاضہ کرنے پر ملزم کاشف ضمیر نے ایگریمنٹ کینسل کر دیا ، سی آئی اے اقبال ٹاؤن نے ملزم کی گرفتاری کے لئے چھاپہ مارا تو ملزم نے خود کو سرکاری افسر ظاہر کیا،ملزم کے قبضے سے نیلی لائٹ والی گاڑی اور اسلحہ برآمد کر کے دوسرا مقدمہ تھانہ نشتر کالونی میں درج کر لیا گیا۔

ملزم کے خلاف نوسربازی کے مقدمات پہلے بھی درج ہیں اور اس سے پہلے بھی ملزم کو گرفتار کیا جاچکا ہے۔