گوگل نیوز پر ہمیں فالو کریںپاکستان میں حملے کیلئے آنے والے تین بھارتی لڑاکا طیارے پاکستان کے جوابی حملے میں بھارت کی اپنی ہی زمین پر گر کر تباہ ہو گئے۔
سینئر بھارتی سیکورٹی ذرائع کے مطابق بدھ کے روز دو طیارے بھارت کے زیر قبضہ جموں و کشمیر میں اور ایک پنجاب میں گرا لیکن یہ واضح نہیں ہو سکا کہ پائلٹس کے ساتھ کیا ہوا۔
فرانسیسی خبر رساں ادارے اے ایف پی کے مطابق مقبوضہ کشمیر کے علاقے وُہان میں ایک تباہ شدہ بھارتی جنگی طیارے کا ملبہ بھی دیکھا گیا۔
پاکستان کے وزیر دفاع خواجہ آصف نے بلوم برگ ٹی وی سے گفتگو میں تصدیق کی کہ پاکستان کی مسلح افواج نے بھارت کے پانچ لڑاکا طیارے مار گرائے اور کئی ڈرونز بھی تباہ کیے۔ ساتھ ہی بھارتی بریگیڈ ہیڈکوارٹر کو بھی نشانہ بنایا گیا۔
پاکستانی وزیراطلاعات عطااللہ تارڑ نے بھی اس کی توثیق کرتے ہوئے کہا کہ بھارت کے یہ طیارے مختلف مقامات پر گرائے گئے۔
پاکستانی فوج نے رائٹرز کو بتایا کہ مار گرائے گئے طیاروں میں رافیل، ایس یو30 اور مگ29 شامل تھے اور ان پر اس وقت حملہ کیا گیا جب وہ پاکستانی فضاؤں میں دخل اندازی کر رہے تھے۔
