گوگل نیوز پر ہمیں فالو کریںایبٹ آباد کے علاقے چھانگلہ گلی میں نجی سوسائٹی میں چھریوں کے وار سے ایک شخص جاں بحق اور ایک زخمی ہوگیا، واقعے کے بعد مقتول کے لواحقین نے احتجاج کیا جبکہ مشتعل ہجوم نے پولیس کی موجودگی میں مبینہ ملزم کو ہلاک کردیا اور نجی سوسائٹی کے دفتر کو آگ لگادی۔
پولیس کے مطابق ایبٹ آباد میں تھانہ چھانگلہ گلی کی حدود میں واقع نجی سوسائٹی میں نامعلوم ملزم نے چھریوں کے وار سے ایک نوجوان کو قتل کردیا جبکہ واقعے میں ایک شخص زخمی بھی ہوا، زخمی کو فوری طبی امداد کے لیے اسپتال منتقل کر دیا گیا۔
جاں بحق شخص کی شناخت عمران عباسی کے نام سے ہوئی، ارتکابِ جرم کے بعد ملزم موقع سے فرار ہوگیا جبکہ مقتول عمران عباسی کے ورثا نے ملزم کی گرفتاری کے لیے شدید احتجاج کیا۔
دوسری جانب ایبٹ آباد کے علاقے چھانگلہ گلی کی حدود سمبر کے علاقے میں نوجوان کو چھریوں کے وار سے قتل کرنے والے میبنہ قاتل کو مشتعل ہجوم نے پکڑ کر ہلاک کردیا۔
مشتعل ہجوم نے پولیس کی موجوگی میں مبینہ ملزم کو مار دیا جبکہ مشتعل افراد نے نجی سوسائٹی کے دفتر کو آگ بھی لگا دی۔
پولیس مشتعل ہجوم کو کنٹرول کرنے میں ناکام ہوگئی، جس کے بعد حالات بدستور کشیدہ ہیں، مظاہرین نے آگ بجھانے کے لیے جانے والی مری اور ایبٹ آباد کی فائر برگیڈ کو بھی روک لیا۔
