بلدیاتی اداروں کے کنٹریکٹ اساتذہ کی تنخواہیں سندھ حکومت دے گی، ناصر حسین شاہ

کراچی: صوبائی وزیر اطلاعات و بلدیات سندہ سید ناصر حسین شاہ نے بلدیاتی اداروں کے کنٹریکٹ اساتذہ کی تنخواہوں کی ادائیگی کے لیے محکمہ تعلیم سندھ کو ہدایت کردیں، قانونی تقاضے پورے کر کے تمام کنٹریکٹ اساتذہ کو اب تنخواہیں دی جائیں گی۔

صوبائی وزیر اطلاعات و بلدیات سندہ سید ناصر حسین شاہ سے ڈی ایم سی وسطی کے 40 سے زائد خواتین اساتذہ نے ملاقات کی، اساتذہ نے صوبائی وزیر بلدیات سے درخواست کی وہ 10 سال سے زیادہ عرصے سے ڈی ایم سی وسطی کے تحت چلنے والے اسکولوں میں خدمات سرانجام دے رہی ہیں۔ لیکن انہیں مستقل نہیں کیا گیا۔

اساتذہ نے مزید کہا کہ انہیں گذشتہ تین ماہ سے تنخواہیں نہیں ملیں، اس موقع پر صوبائی وزیر بلدیات سید ناصر حسین شاہ نے اساتذہ کو یقین دہانی کرائی کہ تین ماہ کی تنخواہوں کا مسئلہ فوری حل کیا جائے گا۔

صوبائی وزیر نے کہا کہ سندھ حکومت بلدیاتی اداروں کے زیر انتظام تعلیمی اداروں کی بہتری کیلئے مختلف تجاویز پر کام کر رہی ہے، تمام تعلیمی اداروں کو محکمہ تعلیم سندھ منتقل کرنے کے قانونی پہلوؤں کا جائزہ لیا جا رہا ہے۔

سید ناصر حسین شاہ نے کہا کہ اساتذہ اپنی فرائض ذمہ داری سے سرانجام دیں اور سرکاری اسکولوں میں بہتری لانے میں اپنی تمام صلاحیتوں کو بروئے کار لائیں تاکہ طلبہ کو مستقبل کے چیلنجز کا مقابلہ کرنے کیلئے بہتر تعلیم و تربیت سے آراستہ کیا جا سکے۔