گوگل نیوز پر ہمیں فالو کریںالخدمت فاؤنڈیشن پاکستان کے صدر ڈاکٹر حفیظ الرحمان نے عید الاضحیٰ مصر کے دار الحکومت قاہرہ میں غزہ کے مظلوم لٹے پٹے مہاجرین کے ساتھ منائی۔
صدر الخدمت نے تجمل خامس قاہرہ میں عید کی نماز ادا کرنے کے بعد غزہ جنگ سے متاثرہ خاندانوں سے ملاقات کی، انہیں قربانی کا گوشت فراہم کیا جبکہ بچوں میں تحائف اور عیدی تقسیم کی۔ بعد ازاں صدر الخدمت نے مختلف اسپتالوں میں زیر علاج غزہ کے زخمیوں کی عیادت بھی کی۔
یاد رہے کہ الخدمت فاؤنڈیشن پاکستان غزہ کے مظلوم فلسطینی مسلمانوں کیلئے 1600 بڑے جانوروں اور 1300چھوٹے جانوروں کی قربانی کررہی ہے۔ جن میں 100 بھیڑیں غزہ اور القدس، 100 گائے قاہرہ مصر جبکہ 1500 گائے اور 1200بکرے کراچی پاکستان میں قربان کیے جائیں گے۔
غزہ اور مصر میں گوشت فوری تقسیم کیا جائے گا جبکہ پاکستان میں ہونے والی قربانی کا گوشت پراسس کے بعد ٹِن پیکس میں پیکنگ کے بعد غزہ متاثرین تک بھجوایا جائے گا۔
قبل ازیں ڈاکٹر حفیظ الرحمان نے بلبیس کے مقام پر کیٹل فارم کا دورہ کیا اور الخدمت فاؤنڈیشن کی جانب سے خریدے گئے قربانی کے جانوروں کا جائزہ لیا۔ صدر الخدمت نے کہا کہ عید خوشیوں کا تہوار ہے اور اہل پاکستان اپنے فلسطینی بہن بھائیوں کو عید کی خوشیوں میں یاد رکھے ہوئے ہیں۔
ڈاکٹر حفیظ الرحمان نے بتایا کہ الخدمت نے قاہرہ کے مضافات میں 8 منزلہ رہائشی عمارت کرایے پر لی ہے جہاں فلسطینی خاندانوں کو ایک سال کے لیے ٹھہرائے جانے کا انتظام کیا ہے۔
الخدمت قاہرہ میں 2000 خاندانوں کو رجسٹر کر چکی ہے جبکہ 200 خاندانوں کے لیے رہائش سمیت دیگر ضروریات زندگی کا انتظام کر رہی ہے۔
