گوگل نیوز پر ہمیں فالو کریںکراچی: پاکستان پیپلز پارٹی کے چیئرمین بلاول بھٹو زرداری نے اسلامی دنیا کی پہلی منتخب وزیراعظم و پارٹی چیئرپرسن شہید محترمہ بینظیر کو شاندار الفاظ میں خراج عقیدت پیش کرتے ہوئے کہا ہے کہ بینظیر بھٹو ایک تحریک و مشعلِ راہ ہے۔ قوم ان کے قومی جذبے، طویل جدوجہد و مضبوط قیادت کو کبھی فراموش نہیں کرے گی۔
پی پی پی چیئرمین نے شہید محترمہ بینظیر کے 14ویں یومِ شہادت پر اپنے پیغام میں مزید کہا ہے کہ شہید محترمہ بینظیر بھٹو مثالی عالمی لیڈر تھیں، جنہوں نے پاکستان میں بڑی بہادری سے جمہو ریت کے لیے تاریخی جدوجہد کی، اور ملک کو بانی اجداد کے فکر و وژن کی روشنی میں حقیقی فلاحی ریاست بنانے کے لیئے اقدام کیئے۔
چیئرمین بلاول بھٹو زرداری نے کہا کہ شہید محترمہ بینظیر بھٹو کا راولپنڈی میں قتل صرف عوام کو غربت، بیروزگاری اور ناانصافیوں سے نجات دلانے کے خواب کا قتل نہیں تھا، بلکہ پوری قوم کو قتل کرنے کی سازش تھی۔
انہوں نے نشاندہی کرتے ہوئے کہا کہ اس سازش کو سابق صدرِ مملکت آصف علی زرداری نے “پاکستان کھپے” کے نعرے سے ناکام بنایا تھا۔ پی پی پی چیئرمین نے کہا کہ شہید محترمہ بینظیر بھٹو ہمہ گیر شخصیت کی مالک تھیں۔
جنہوں نے بطور ایک عوامی رہنما پاکستان میں اتحاد، ہم آہنگی اور ترقی پسند سوچ کو فروغ دیا، اور عوام کے سیاسی و معاشی حقوق کی حفاظت کی، جبکہ بطور وزیراعظم انہوں نے شدید مخالفت و رکاوٹوں کے باوجود ملک میں عوام دوست پالیسیاں متعارف کرائیں اور عوامی خدمت پر مبنی بیشمار اقدامات کئے، اور عالمی سطح پر پاکستان کے درست امیج کو بھی اجاگر کیا۔
انہوں نے کہا کہ اسلامی دنیا کی پہلی منتخب خاتون وزیراعظم کی جانب سے اپنی مادرِ وطن کی دفاع کے لیئے میزائیل ٹیکنالاجی کا تحفہ بھی ایک ناقابلِ فراموش تحفہ ہے۔
چیئرمین بلاول بھٹو زرداری نے کہا کہ شہید محترمہ بینظیر بھٹو نے اپنی جدوجہد کے دوران آمریتی کرگسوں کے ہاتھوں اپنے والد، دو بھائیوں اور حتی کہ اپنی والدہ کو گنوایا، اور خود بھی زندگی کی آخری گھڑی تک بلا خوف و خطر جمہوریت کی لڑائی لڑتے ہوئے جامِ شہادت نوش کیا۔
مزید پڑھیں: پیپلزپارٹی تمام پاکستانیوں کی نمائندہ جماعت ہے،بلاول بھٹو زرداری
