مشکل میں ہیں، آئی ایم ایف نے اب تک معاہدے پر دستخط نہیں کیے، وفاقی وزیر افسردہ

اسلام آباد: وفاقی وزیرِ داخلہ رانا ثناء اللہ نے کہا کہ ہم اس وقت مشکل میں ہیں کیونکہ آئی ایم ایف نے اب تک معاہدہ جاری رکھنے پر دستخط نہیں کیے ہیں۔

تفصیلات کے مطابق وفاقی وزیرِ داخلہ رانا ثناء اللہ نے اپنے ایک بیان میں کہا کہ پاکستان تحریک انصاف کو اپنی غلطیاں تسلیم کرکے میثاق معیشت پر حکومت کے ساتھ بیٹھنا چاہیے، انہوں نے آئی ایم ایف کے ساتھ ایسا معاہدہ کیا جو پاکستان کے حالات کے مطابق نہیں تھا۔

انہوں نے کہا کہ پی ٹی آئی نے تمام سبسڈیز کو ختم کرنے کا وعدہ کیا جبکہ عوام کی معاشی حالت ایسی ہے کہ ہم یہ نہیں کرسکتے، آئی ایم ایف سے معاہدے میں گزشتہ حکومت نے پیٹرول پر سبسڈی زیرو کرنے کا وعدہ کیا تھا۔

رانا ثناء اللہ کا کہنا تھا کہ آئی ایم ایف کے پاس گزشتہ حکومت کے ساتھ کیا گیا معاہدہ موجود ہے اور وہ وہی شرائط رکھ رہا ہے جو کہ پچھلی حکومت سے کیے گئے معاہدے میں موجود تھیں۔

یہ بھی پڑھیں:

محکمہ موسمیات نے ملک میں طوفانی بارش کی پیش گوئی کردی

وفاقی وزیرِ داخلہ نے کہا کہ معیشت پر اسحاق ڈار رہنمائی کررہے ہیں وہ حالات سے باخبرہیں، پی ٹی آئی نے معیشت ایسی خراب کردی ہے کہ اب اُسے کنٹرول کرنے میں مشکل ہورہی ہے، جب ڈالر کنٹرول میں تھا تو انہوں نے واویلا کیا کہ ڈالر کواسحاق ڈار نے قید کیا ہوا ہے، جب ڈالر کو آزاد چھوڑا تو ڈالر 115 سے 190 پرآیا، ہمارے 2 ماہ میں ڈالر 190 سے آگے گیا۔

انہوں نے کہا کہ مشکل یہ پڑی ہے کہ آئی ایم ایف اپنی شرائط میں لچک پیدا کرنے کو تیار نہیں، آئی ایم ایف سے کہا گیا کہ پیٹرول پر پیسے تین چار اقساط میں بڑھا دیں گے لیکن وہ نہیں مانے، پیٹرول کی قیمت بڑھانے کے باوجود آئی ایم ایف نے اب تک معاہدہ جاری رکھنے پر دستخط نہیں کیے، ڈالر کی قیمت بڑھنے کی وجہ صرف اور صرف آئی ایم ایف سے معاہدے میں تاخیر ہے لہٰذا جیسے ہی آئی ایم ایف سے معاہدہ ہوجائے گا تو ڈالر کو 182 پر لے آئیں گے۔

علاوہ ازیں پاکستان تحریک انصاف کی جانب سے کیے گئے احتجاج پر ردعمل دیتے ہوئے رانا ثناء اللہ نے کہا کہ پرسوں رات پی ٹی آئی کے احتجاج سے عوام نے خود کو الگ رکھا، پی ٹی آئی کی برگر کلاس کسی جگہ ہزار کسی جگہ 2 ہزار تھی اور اس سے زیادہ لوگ نہیں تھے، تین چار مقامات پر ہی ہزار سے 2 ہزار لوگ تھے باقی جگہ 70 سے 150 لوگ تھے ، 22 کروڑ کی آبادی میں پی ٹی آئی کے احتجاج پر صرف 10 سے 12 ہزار لوگوں نے دھیان دیا۔