حکومت مذاکرات پر یقین رکھتی ہے لیکن بلیک میل نہیں ہونگے، فواد چوہدری

اسلام آباد: وفاقی وزیر اطلاعات فواد چوہدری کا کہنا ہے کہ حکومت مذاکرات پر یقین رکھتی ہے لیکن بلیک میل نہیں ہونگے، انہوں نے کہا کہ لاہور میں پولیس اور رینجرز اہلکاروں کو اغوا کیا گیا جس کے بعد کارروائی ہوئی۔

ٹویٹر پر جاری اپنے بیان میں وفاقی وزیر اطلاعات فواد چوہدری کا کہنا تھا کہ لاہور میں پولیس اور رینجرز اہلکاروں کو اغوا کیا گیا جس پر آپریشن ہوا۔انہوں نے کہا کہ کہ ریاست کالعدم مسلح گروہ کے سامنے بلیک میل نہیں ہوئی۔ وزیراعظم عمران خان عاشق رسول ﷺ ہیں، انہوں نے ہر فورم پر بات کی ہے۔

https://twitter.com/FawadPTIUpdates/status/1383789549399117827

واضح رہے کہ وفاقی وزیر داخلہ شیخ رشید احمد نے اپنے بیان میں کہا تھا کہ ناموس رسالت ﷺ پر آنچ نہیں آنے دیں گے نہ ہی ناموس رسالت ﷺ کی شان میں کوئی گستاخی قبول کریں گے۔

شیخ رشید نے کہا کہ بادل ناخواستہ کچھ اقدامات کرنا پڑے، حکومت اپنی رٹ قائم کرے گی، 192 مقامات بلاک کیے گئے تھے، ایک کے علاوہ سب کلئیر کرا لیے، صرف ایک جگہ حالات کشیدہ ہیں،وہ بھی جلد کلیئر ہوجائے گا۔

وفاقی وزیر داخلہ نے ان خیالات کا اظہار رمضان المبارک کے دوران شہریوں کو زیادہ نرخوں پر اشیائے ضروریہ کی فراہمی کیلئے قائم کیے گئے سستا بازار کے دورے کے دوران پریس کانفرنس کے دوران کہی۔

شیخ رشید کا مزید کہنا تھا کہ سی ڈی اے نے رمضان میں دس سستے بازار جبکہ پانچ اسلام آباد انتظامیہ نے لگائے ہیں۔ انہوں نے ہدایت کی کہ عوام کی سہولت کے لیے مزید سستے بازار کھولے جائیں۔تاکہ عوام کو زیادہ سے زیادہ فائدہ حاصل ہوسکے۔