پیٹرول بم گراکرحکومت نے عوام سے عید کی خوشیاں بھی چھین لیں، شہباز شریف

اسلام آباد:قائد حزب اختلاف و مسلم لیگ ن کے صدر شہباز شریف نے پیٹرول، چینی کی قیمتوں میں اضافے کی شدید الفاظ میں مذمت کرتے ہوئے کہا ہے عید کے موقع پر عوام پر ایک اور پٹرول بم پھینک دیا گیا ہے جو سراسر زیادتی ہے۔

قائد حزب اختلاف شہباز شریف نے اپنے ایک بیان میں کہا کہ حکومت 25 روپے لیٹر پیٹرول مہنگا کر کے پہلے ہی معاشی دہشت گردی کر چکی ہے، نااہل، نالائق اور کرپٹ حکومت نے عید سے قبل ایک اور پیٹرول بم گرا کر عوام کی رہی سہی خوشیاں بھی چھین لی ہیں۔

رہنما ن لیگ نے کہاکہ مہنگائی، بیروزگاری اور معیشت کی تباہی سے عوام پہلے ہی پریشان ہیں، مسلم لیگ ن کی حکومت میں 52 روپے فروخت ہونے والی چینی 100 روپے کلو مل رہی ہے، یہ ہے تبدیلی؟ یہ ہے نیا پاکستان؟

قائد حزب اختلاف شہباز شریف نے کہا کہ عید پر چینی اور پیٹرول مہنگا کر کیعمران نیازی حکومت نے عوام دشمنی کا مظاہرہ کیا ہے، بے حس حکومت کو عوام کی تکالیف کا کوئی احساس نہیں ہے۔