وفاقی حکومت نے سویڈن میں قرآن پاک کی بیحرمتی کے گھنائونے عمل کیخلاف جمعہ کو ملک گیر احتجاج اور یوم تقدس قرآن منانے کا فیصلہ کیا ہے۔

وزیر اعظم شہبازشریف کی زیر صدارت اہم اجلاس ہوا، جس میں انہوں نے ہدایت کی جمعہ کو ملک بھر میں سویڈن واقعے کی مذمت میں احتجاجی ریلیاں نکالی جائیں، انہوں نے مسلم لیگ (ن) کو جمعہ کے دن یوم تقدیس قرآن میں بھرپور شرکت کی ہدایت کی ہے۔

اجلاس میں جمعرات کو پارلیمنٹ کا مشترکہ اجلاس بلانے کا بھی فیصلہ کیا گیا، مشترکہ اجلاس میں سویڈن واقعہ پر قومی لائحہ عمل مرتب کیاجائے گا۔

یہ بھی پڑھیں:

وزیراعظم شہبازشریف کا اجلاس سے خطاب کرتے ہوئے کہا کہ پارلیمنٹ کے فورم سے قوم کے جذبات اور احساسات کی بھرپور ترجمانی کی جائے اور نفرتی عمل کیخلاف مشترکہ قراردادمنظور کی جائے۔

انہوں نے کہا کہ قرآن کریم کی عزت وحرمت ہمارے ایمان کا حصہ ہے، اس کے لئے ہم سب ایک ہیں، گمراہ ذہن اسلاموفوبیا کے منفی رجحان کو پھیلاکر مذموم ایجنڈے پر عمل پیرا ہیں۔ وزیر اعظم نے کہا کہ دنیا بھر کی امن پسند، بقائے باہمی پر یقین رکھنے والی اقوام اور قیادت اسلاموفوبیا کا شکار اور مذہبی تعصبات کی حامل متشدد قوتوں کا راستہ روکیں۔

شہبازشریف نے کہا کہ مذہب، مقدس ہستیوں ، عقائد اورنظریات کو نشانہ بنانے والے متشدد ذہن دنیا کے امن کے لئے خطرہ ہیں، عالمی سطح پرپرامن، متوازن اور بین المذاہب ہم آہنگی پر یقین رکھنے والی قوتیں مل کر ایسے رجحانات اور واقعات کے تدارک کے لئے کام کریں۔