گوگل نیوز پر ہمیں فالو کریںپاکستان کرکٹ ٹیم کی ٹی 20 ورلڈکپ سے ذلت آمیز واپسی کے بعد ٹیم مینجمنٹ میں مبینہ سرجری کا شکار ہونے والے سیلکٹر وہاب ریاض کی برطرفی کے متعلق نئی کہانی سامنے آئی ہے۔
ذرائع کا کہنا ہے کہ قومی ٹیم کی ناقص کارکردگی پر وہاب ریاض کو ذمے داری قبول کرکے مستعفی ہونے کا کہا گیا تھا، تاہم وہاب ریاض نے از خود مستعفی ہونے سے گریز کیا، جس کے بعد انکار پر وہاب ریاض کو عہدے سے ہٹادیا گیا ہے۔
بتایا گیا ہے کہ وہاب ریاض پر دباؤ ڈالا جا رہا تھا کہ وہ ٹیم سلیکشن کی ذمے داری قبول کریں تاہم وہاب ریاض ڈٹ گئے اور دباؤ میں نہیں آئے۔
واضح رہے کہ وہاب ریاض مین سلیکشن کمیٹی جبکہ عبد الرزاق مین اور ویمن سلیکشن کمیٹیز کے رُکن تھے۔ پاکستان کرکٹ بورڈ نے وہاب ریاض اور عبد الرزاق کو سلیکشن کمیٹیوں سے الگ کرنے کی تصدیق کر دی ہے۔
پی سی بی کی جانب سے جاری کردہ اعلامیہ میں کہا گیا ہے کہ عبد الرزاق اور وہاب ریاض کی مین اور ویمن سلیکشن کمیٹی میں خدمات درکار نہیں۔
