پارٹی میں میرا کوئی دھڑا نہیں، میری سیاست کا محور نواز شریف ہیں،خواجہ آصف

اسلام آباد:پاکستان مسلم لیگ (ن) کے رہنما خواجہ آصف نے کہا ہے کہ پارٹی میں میرا کوئی دھڑا نہیں، میری سیاست کا محور نواز شریف ہیں۔

خواجہ آصف کا کہنا تھا کہ بڑی پارٹیوں میں دھڑے ہونا نئی بات نہیں،اختلافات ہوتے رہتے ہیں، انہوں نے کہا کہ مریم نواز اور حمزہ شہباز کا سیاست میں اپنا اپنا مقام ہے،ان کے قائد بھی نوازشریف ہیں۔

خواجہ آصف نے کہا کہ ووٹ کوعزت دو کا نعرہ جمہوریت کی اساس ہے، پچھلے2 سال میں حکومت نے صرف ناکامی دکھائی ہے۔انہوں نے کہاکہ سرداراخترمینگل کے خاندان کا پاکستانی سیاست میں اہم مقام ہے۔

انہوں نے2 سال تک حکومت کیساتھ چلنے کی کوشش کی جبکہ ق لیگ کی بھی حکومت سے ناراضگی چل رہی ہے۔انہوں نے کہا کہ اگر ہمارے دور میں بلوچستان میں ڈاکٹرمالک کی حکومت برقرار رہتی تواچھا ہوتا۔

خواجہ آصف نے کہا کہ پی ٹی آئی بیشک مدت پوری کرے لیکن نیا بندہ لائیں جو پرفارم کرے، میں نے تجویز دی تھی کہ 4 یا 6 ماہ کیلئے قومی حکومت بنائیں جو مسائل حل کرسکے۔