گوگل نیوز پر ہمیں فالو کریںبنوں: خیبر پختونخوا کے ضلع بنوں میں جمعہ کی رات دہشت گردوں نے دو پولیس تھانوں اور ایک پولیس چوکی پر مربوط حملے کیے جس کے نتیجے میں سیکورٹی اہلکاروں اور حملہ آوروں کے درمیان شدید فائرنگ کا تبادلہ ہوا۔
پولیس ذرائع کے مطابق نامعلوم موٹرسائیکل سواروں نے کھوجری پولیس چوکی پر دو دستی بم پھینکے تاہم خوش قسمتی سے کوئی جانی نقصان نہیں ہوا۔
حملے کے بعد مقامی افراد پولیس کے ساتھ اظہار یکجہتی کے لیے ہتھیار اٹھا کر چوکی کی حفاظت کے لیے متحرک ہو گئے۔ علاقے کے عمائدین نے بھی سیکورٹی کو یقینی بنانے میں فعال کردار ادا کرنے کا اعلان کیا۔
دوسری جانب دہشت گردوں نے بکا خیل اور غوریوالہ تھانوں کو بھی نشانہ بنایا، جہاں پولیس اور حملہ آوروں کے درمیان شدید فائرنگ کا تبادلہ ہوا۔ ان حملوں نے علاقے میں خوف و ہراس پھیلا دیا۔
سیکورٹی فورسز نے دہشت گردوں کی تلاش کے لیے علاقے میں سرچ آپریشن شروع کر دیا ہے جبکہ قانون نافذ کرنے والے اداروں نے مزید حملوں کی روک تھام کے لیے سیکورٹی سخت کر دی ہے۔
مقامی افراد نے پولیس کے ساتھ مکمل تعاون کا عزم ظاہر کرتے ہوئے کہا کہ وہ دہشت گردی کے خلاف بھرپور ساتھ دیں گے اور علاقے میں امن و امان قائم رکھنے میں اپنا کردار ادا کریں گے۔
