شمالی وزیرستان، دہشت گردوں کی فائرنگ سے پاک فوج کا سپاہی شہید

پشاور: دہشت گردوں نے شمالی وزیرستان کے علاقے دتہ خیل میں پاک فوج پر فائرنگ کی جس کے نتیجے میں سپاہی شاہ زیب نے جامِ شہادت نوش کر لیا ہے۔

تفصیلات کے مطابق دتہ کیل میں دہشت گردوں اور سکیورٹی فورسز کے مابین فائرنگ کا تبادلہ ہوا۔ آئی ایس پی آر کا کہنا ہے کہ شدید فائرنگ کے دوران گولی لگنے سے پاک فوج کے سپاہی شاہ زیب امتیاز شہید ہوگئے۔

پاک فوج کے شعبۂ تعلقاتِ عامہ (آئی ایس پی آر) کا کہنا ہے کہ سکیورٹی فورسز نے دہشت گردوں کا پامردی سے مقابلہ کرتے ہوئے ان کے ٹھکانوں کو نشانہ بنایا۔ فائرنگ کے تبادلے کے بعد سرچ آپریشن بھی کیا گیا۔

یہ بھی پڑھیں:

شمالی وزیرستان، نوشکی میں پاک فوج کی کارروائی، 4دہشتگرد ہلاک

آئی ایس پی آر کا کہنا ہے کہ پاک فوج کے 25 سالہ شہید سپاہی کا تعلق کوٹلی ستیاں کے علاقے سے تھا۔ ملک دشمن سرگرمیوں میں ملوث دہشت گردوں کے خلاف کارروائی جاری رکھی جائے گی۔ 

خیال رہے کہ اس سے قبل سکیورٹی فورسز نے امن دشمنوں کے خلاف شمالی وزیرستان اور بلوچستان میں کارروائی کرتے ہوئے 4 دہشتگردوں کو ہلاک کردیا۔دہشت گردوں کے خلاف کارروائی خفیہ اطلاع پر کی گئی۔

آج سے 5 روز قبل آئی ایس پی آر کا کہنا تھا کہ سکیورٹی فورسز نے دہشت گردوں کی موجودگی کی اطلاع پر شمالی وزیرستان کے علاقے حسن خیل میں انٹیلی جنس پر مبنی آپریشن کیا۔