ہانگ کانگ میں مظاہرین کی چینی سرکاری نیوز ایجنسی کے دفتر میں توڑ پھوڑ

ہانگ کانگ میں حکومت مخالف مظاہروں کے دوران مظاہرین نے چین کی سرکاری نیوز ایجنسی کے مقامی دفتر میں تھوڑ پھوڑ کی۔

میڈیارپورٹس کے مطابق گزشتہ پانچ ماہ سے جاری مظاہروں کے سلسلے کے دوران یہ پہلا موقع ہے کہ اس نیوز ایجنسی کے دفتر میں توڑ پھوڑ کی گئی ہے۔

مظاہرین نے عمارت کے دروازے توڑ دئیے، دیواروں پر سرخ پینٹ سے نعرے لکھے اور عمارت کے داخلی گزرگاہوں میں آگ بھی لگا دی۔ اسی دوران پولیس نے شہر کے کئی حصوں میں مظاہرین کو منتشر کرنے کے لیے پانی کی تیز دھار اور آنسو گیس کا استعمال کیا ۔

واضح رہے کہ ہانگ میں گزشتہ ماہ احتجاجی مظاہرے کے دوران سینے میں گولی لگنے سے 18 سالہ طالب علم زخمی ہوگیا تھا، واقعے کے بعد طالب علم کے ساتھیوں نے بھی دھرنا دے دیا تھا۔

دریں اثنا ہانگ کانگ میں ایک بار پھر ہزاروں مظاہرین نے حکومت مخالف احتجاج کیا اور حقیقی آزادی کا مطالبہ بھی کیا،مظاہرین کی جانب سے نیو یارک ،سڈنی اور لندن میں بھی مظاہرے کیے گئے ،وکٹوریا پارک کے قریب ہونے والے مظاہرے میں ہزاروں افراد نے حقیقی آزادی کا مطالبہ کیا۔