گوگل نیوز پر ہمیں فالو کریںبنگلادیشی کرکٹر تمیم اقبال نے یوٹرن لیتے ہوئے ریٹائرمنٹ کا فیصلہ واپس لے لیا، بنگلہ دیشی کرکٹر تمیم اقبال نے یہ اعلان بنگلا دیشی وزیر اعظم شیخ حسینہ واجد سے ملاقات کے بعد کیا۔
بنگلادیشی کرکٹر نے گزشتہ روز ایک پریس کانفرنس کے دوران تمام طرز کی کرکٹ سے ریٹائرمنٹ کا فیصلہ کیا تھا، جس کے بعد بنگلادیش کی وزیراعظم شیخ حسینہ واجد نے معاملے میں مداخلت کی اور تمیم اقبال سے ملاقات کی۔
بنگلہ دیشی کرکٹر نے اپنی اہلیہ، سابق کپتان مشرفی مرتضیٰ اور بنگلادیش کرکٹ بورڈ کے صدر نجم الحسن کے ہمراہ وزیر اعظم سے ملاقات کی جس میں انہوں نے ریٹائرمنٹ واپس لینے کا فیصلہ کیا۔
تمیم اقبال نے وزیراعظم سے ملاقات کی تصویر پوسٹ کرتے ہوئے لکھا ’وزیراعظم کو نا نہیں کہہ سکتا۔‘ بنگلادیش کرکٹ بورڈ کے ڈائریکٹر جلال یونس کا اس حوالے سے کہنا تھا کہ بنگلہ دیشی کرکٹر تمیم اقبال چھ ہفتے آرام اور اپنی فٹنس پر کام کریں گے۔
مزید پڑھیں:حارث رؤف مزنہ مسعود کیساتھ رشتہ ازدواج میں منسلک ہوگئے
بنگلادیشی شائقین کرکٹ نے تمیم اقبال کی اچانک ریٹائرمنٹ پر افسردگی کا اظہار کیا تھا کیوں کہ ورلڈکپ 2023 میں تین ماہ رہ گئے ہیں اور ان کی امیدیں تمیم اقبال پر ہیں۔ امکان ظاہر کیا جارہا ہے کہ تمیم اقبال ورلڈکپ میں بھی بنگلادیشی ٹیم کے لئے کپتانی کے فرائض سرانجام دیں گے۔
