افغان صدرکی دھمکی پر طالبان نے کارروائیوں میں اضافے کا عندیہ دیدیا

کابل: افغانستان کے صدر اشرف غنی کی جانب سے افغان فوج کو جنگجوؤں پر جارحانہ حملے کرنے کی ہدایت پر طالبان نے بھرپور جواب دینے اور عسکری کارروائیوں میں اضافے کا عندیہ دیا ہے،افغان طالبان کی جانب سے صدر اشرف غنی کو کھلا پیغام دے دیا گیا ہے۔

بین الاقوامی میڈیا کے مطابق طالبان نے کابل کے زچہ و بچہ اسپتال میں حملے میں ملوث ہونے کے کابل حکومت کے الزام کو مسترد کرتے ہوئے کہا کہ اگر افغان فوج نے جارحانہ حملے کیے تو بھرپور مقابلہ کیا جائے گا۔طالبان کا کہنا تھا کہ اسپتال پر حملے میں ہمارا کردار نہیں۔

ترجمان طالبان نے مزید کہا کہ افغان فوج کی جارحیت کے نتیجے میں ہم بھی اپنی عسکری کارروائیاں بڑھا سکتے ہیں۔ ہم نے کبھی حملوں میں خواتین اور بچوں کو نقصان نہیں پہنچایا۔انہوں نے کہا کہ اگر ایسا کیا گیا تو بھرپور رد عمل دیا جائے گا۔

واضح رہے کہ صدر اشرف غنی نے زچہ و بچہ اسپتال پر حملے کے بعد قوم سے اپنے خطاب میں واقعے کی ذمہ داری طالبان پر عائدکی تھی، فوج کو دفاع کی پالیسی کو ترک کرکے طالبان پر جارحانہ حملے کرنے کی ہدایت کی تھی۔جس پر طالبان کا ردعمل سامنے آگیا ہے۔

واضح رہے کہ منگل کے روز مسلح افراد نے کابل کے زچہ وبچہ اسپتال کے اندر گھس کر اندھا دھند فائرنگ کی تھی جس کے نتیجے میں نرسوں، ماؤں اور نوزائیدہ بچوں سمیت 24 افراد ہلاک ہوگئے تھے۔ تاحال کسی گروپ نے حملے کی ذمہ داری قبول نہیں کی ہے۔اس واقعے کے بعد افغان صدر نے قوم سے خطاب کیا تھا۔