قیدیوں کے تبادلے کیلئے طالبان کاوفد مذاکرات کیلئے افغانستان پہنچ گیا

کابل: طالبان کی تین رکنی ٹیم قیدیوں کے تبادلے کا عمل شروع کرنے کے لئے افغانستان پہنچ گئی، یہ اجلاس آج کابل کے ایک ہوٹل میں ہوگا۔ 29 فروری کو قطر میں امریکا اور طالبان کے درمیان معاہدے پر قیدیوں کا تبادلہ ایک اہم نکتہ تھا۔

اس امن معاہدے کی شرائط کے تحت غیر ملکی کی فوجیں 14 ماہ کے اندر اندر افغانستان سے واپس چلی جائیں گی جو طالبان کی سیکورٹی گارنٹی کے تحت ہو گا۔

اس معاہدے میں 6000 قیدیوں کے تبادلے کا معاملہ بھی شامل ہے جو افغان حکومت اور افغان طالبان کے درمیان ہونا ہے۔

اس سلسلے میں طالبان کے ترجمان ذبیح اللہ مجاہد نے کہاہے کہ ہماری تین رکنی ٹیم قیدیوں کی شناخت اور ان کی آمد و رفت اوررہائی کے عمل میں مدد کرے گی۔

مزید پڑھیں: افغان صدر اشرف غنی کی جانب سے طالبان قیدیوں کا رہائی کا پروانہ مل گیا

اس تبادلے کے عمل اور وقت پر طالبان اور افغان حکومت میں اختلاف تھا تاہم کئی ہفتوں کے بعد یہ عمل طالبان ٹیم کی آمد کے ساتھ شروع ہور ہاہے۔

امریکی وزیر خارجہ نے اس پیشرفت کو خوشخبری قرار دیا تھا اور انہوں نے گذشتہ ہفتے اس عمل کو آگے بڑھانے کے لئے تمام فریقوں سے درخواست کی تھی۔