پنج شیر میں لڑائی جاری، طالبان کا کئی علاقوں پر قبضے کا دعویٰ

کابل:افغانستان کی وادی پنج شیر میں طالبان اور احمد مسعود کی فورسز میں لڑائی جاری ہے، دونوں جانب سے ایک دوسرے کے بھاری جانی نقصان کے دعوے کیئے جا رہے ہیں۔

غیر ملکی خبر ایجنسی کے مطابق طالبان کے ترجمان ذبیح اللہ مجاہد نے کہا کہ ان کے جنگجووں نے پنج شیر میں داخل ہو کر متعدد علاقوں پر قبضہ کر لیا ہے۔

انہوں نے کہا کہ مقامی مسلح گروہ سے مذاکرات ناکام ہونے پر آپریشن شروع کیا گیا، جس میں مخالفین کو بھاری نقصان ہوا۔

مزید پڑھیں:افغانستان میں طالبان کی حکومت کا اعلان آج بعد نماز جمعہ متوقع

ادھر افغان قومی مزاحمتی تحریک کے ترجمان نے کہا کہ تمام دروں اور داخلی راستوں پر ان کا قبضہ ہے۔انہوں نے دعوی کیا کہ وادی کے داخلی علاقے ضلع شتل میں قبضے کے لیے طالبان کی کوششوں کو ناکام بنا دیا گیا ۔

افغان قومی مزاحمتی تحریک کے ترجمان کے مطابق رواں ہفتے کے آغاز میں جب سے لڑائی شروع ہوئی ہے 2 مقامات پر طالبان کے جنگجووں کی بڑی تعداد کو نشانہ بنایا گیا ہے۔

دوسری جانب طالبان کا اس حوالے سے کہنا تھا کہ پنج شیر وادی کا چار طرف سے گھیراو کر لیا گیا ہے اور باغیوں کی کامیابی ناممکن ہے، تاہم باغیوں نے ہتھیار ڈالنے سے انکار کر دیا ہے۔