اومی کرون سے نمٹنے کیلئے امریکی ہوائی اڈوں پر اقدامات سخت کردیئے گئے

نیویارک:کورونا وائرس کے افریقن ویرینٹ اومی کرون سے نمٹنے کیلئے امریکی ہوائی اڈوں پر اقدامات سخت کرنے کا فیصلہ کیا گیا ہے۔

بین الاقوامی میڈیا رپورٹس میں بتایا گیا ہے کہ تمام ممالک سے امریکا جانیوالوں کو اب بورڈنگ سے ایک روز پہلے کورونا ٹیسٹ کرانا ہوگا۔

رپورٹس کے مطابق امریکا پہنچنے کے تین سے پانچ روز بعد بھی ٹیسٹ لازم کرنے پر غور کیا جارہا ہے۔غیرملکی میڈیا کے مطابق امریکی صدر جو بائیڈن جمعرات کو کورونا وائرس سے متعلق نئی پالیسی کا اعلان کریں گے۔

 امریکی ادارے ایف ڈی اے نے کورونا وائرس کیخلاف پہلی دوائی کی توثیق کردی ہے جس کی جلد منظوری کا امکان ہے۔سی ای او موڈرنا کا کہنا ہے کہ موجودہ ویکیسن شاید اومی کرون کیخلاف موثر نہ ہوسکیں۔

دوسری جانب ملائشیا کی جانب سے کورونا وائرس کے نئے جنوبی افریقی ویرینٹ اومی کرون کے ہائی رسک والے ممالک سے مسافروں کی آمد پر پابندی لگا دی گئی ہے۔

میڈیا رپورٹ کے مطابق مغربی افریقی ملک نائجیریا میں اومی کرون ویرینٹ کے پہلے کیس کی تصدیق ہو گئی ہے، نائجیریا میں اومی کرون ویرینٹ کا کیس جنوبی افریقا سے آئے مسافر میں رپورٹ ہوا۔

مزید پڑھیں: اومی کرون کا خطرہ، کورونا سے بچاؤ کیلئے بوسٹر ویکسین آج سے لگائی جائیگی

رپورٹ کے مطابق جاپان میں اومی کرون ویرینٹ کا دوسرا کیس رپورٹ ہو گیا ہے، اس سے قبل جاپان میں اومی کرون ویرینٹ کا پہلا کیس گزشتہ روز رپورٹ ہوا تھا۔