کراچی میں 3 ملزمان کا شہری پر تشدد اور فائرنگ، سی سی ٹی وی ویڈیو سامنے آگئی

کراچی میں 3 مسلح ملزمان نے شہری کو تشدد کا نشانہ بنایا اور فائرنگ کی، واقعے کی سی سی ٹی وی فوٹیج سامنے آگئی ہے۔

تفصیلات کے مطابق ملزمان نے دن کے وقت راہگیر کو تشدد کا نشانہ بنانے کے بعد اسلحے کے زور پر لوٹا۔ واقعہ کراچی کے علاقے مہران ٹاؤن میں پیش آیا۔ شہری مسلسل لوٹا گیا سامان لٹیروں سے واپس مانگتا رہا۔

یہ بھی پڑھیں: 

دانیال عزیز کی گاڑی کو حادثہ، شدید زخمی، ڈرائیور جاں بحق

سی سی ٹی وی فوٹیج میں دیکھا جاسکتا ہے کہ سڑک پر جاتے ہوئے ایک موٹر سائیکل نے ٹکر مار کر راہ گیر کو زمین پر گرایا۔ دوسری موٹر سائیکل سے اس کا راستہ روک لیا گیا۔ ملزمان نے مزاحمت کرنے پر مارپیٹ شروع کردی۔

ایک ملزم نے شہری کی جیب سے رقم اور موبائل فون نکالنے کی کوشش کی۔ ملزمان راہگیر کو لوٹنے کے بعد فرار ہونے لگے تو شہری نے ملزمان سے اپنا پرس واپس کرنے کا کہا۔ ایک ملزم نے اسے بار بار گولی مارنے کی دھمکی دی۔

پرس سے محروم راہگیر کو سی سی ٹی وی فوٹیج میں تشدد کا شکار ہوتے دیکھا جاسکتا ہے۔ آخر میں ایک مسلح ملزم نے اس پر فائرنگ کردی۔ دن دہاڑے شہری کو لوٹنے والے ملزمان دندناتے ہوئے موٹر سائیکلوں پر سوار ہو کر فرار ہو گئے۔