سری لنکا پر روس سے تیل کی خریداری کے باعث معاشی پابندی لگنے کا خدشہ

کولمبو: روس سے تیل خریدنے پر سری لنکا پر جلد ہی معاشی پابندی لگنے کا خدشہ ہے۔ سری لنکن وزیرِ توانائی کا کہنا ہے کہ ملک میں ایک ہی آئل ریفائنری موجود ہے جس میں کام کے دوبارہ آغاز کیلئے روسی تیل خریدا گیا۔

تفصیلات کے مطابق سری لنکا سنگین معاشی بحران کے باعث ایندھن، اشیائے ضروریہ اور بجلی سمیت دیگر اہم سہولیات سے محروم ہے۔ حال ہی میں تکلیف دہ حالات سے دوچار عوام نے مستعفی وزیر اعظم کا گھر جلا دیا تھا۔

یہ بھی پڑھیں:

انتہاء پسند ہندوؤں نے جواہر لعل نہرو کا مجسمہ تباہ کر دیا

آج سے 2 ماہ قبل سری لنکا نے سی پی سی (سیلون پیٹرولیم کارپوریشن) بند کردی جس سے ملک کو مزید معاشی بحران کا سامنا کرنا پڑا۔ وزیرِ توانائی کنچنا وجیسیکرا کا کہنا ہے کہ روسی خام تیل 1ماہ قبل درآمد کیا گیا تھا۔

سری لنکن وزیرِ توانائی نے کہا کہ سری لنکا تیل کی خریداری کیلئے 7 کروڑ 50لاکھ ڈالر ادا نہیں کرسکا۔ سری لنکا روس سے خام تیل کے علاوہ کوئلہ، پیٹرول اور ڈیزل بھی خریدے گا جس کیلئے بات چیت جاری ہے۔

وزیرِ توانائی نے کہا کہ صرف خام تیل سے ملکی ضروریات پوری نہیں ہوں گی تاہم سری لنکن ریفائنری 90 ہزار ٹن سائبیرین خام تیل وصول کرے گی جس کی کھیپ دبئی سے قرض پر حاصل ہوئی تھی۔ تیل کے ٹینڈرز کی بولی کسی نے نہیں دی۔

انہوں نے کہا کہ سی پی سی پہلے ہی تیل دینے والوں کا 73 کروڑ 50 لاکھ ڈالر کا نادہندہ ہے۔ ہم نے دیگر ممالک سے بھی قرض پر خام تیل کی درآمد کیلئے معلومات کیں، تاہم خاطر خواہ جواب یا سائبیرین گریڈ ریفائنری کا مثالی متبادل نہیں ملا۔