رانیل وکرم سنگھے سری لنکا کے نئے وزیراعظم منتخب

کولمبو: سری لنکا کے صدر نے اپنے بھائی کی جگہ نئے وزیر اعظم رانیل وکرم سنگھے سے حلف لے لیا ہے، جن پر ملک کے معاشی بحران کے خلاف ایک احتجاج پر ان کے حامیوں کی جانب سے پرتشدد حملوں کے بعد ملک چھوڑنے پر پابندی عائد کردی گئی ہے۔

سری لنکا کے نومنتخب وزیراعظم رانیل وکرم سنگھے اس سے قبل 5 بار وزیر اعظم کے عہدے پر فائز رہ چکے ہیں لیکن یہ دیکھنا ابھی باقی ہے کہ وہ پارلیمان کے ذریعے نئی قانون سازی کرنے کے قابل ہوسکیں گے۔

73 سالہ وزیراعظم کو ملکی تاریخ کے بدترین بحران سے نبرد آزما ہونے کی ذمہ داری سونپی جائے گی جس میں مہینوں سے جاری شدید قلت اور بجلی کی طویل بندش نے عوام کے غصے کو بھڑکادیا ہے۔

رانیل وکرم سنگھے نے سری لنکا کا وزیراعظم منتخب ہونے کے بعد کہا کہ ہم ملک کو اس پوزیشن پر واپس لانا چاہتے ہیں جب لوگوں کو دوبارہ دن میں 3 وقت کھانا مل سکے گا، ہمارے نوجوانوں کا لازمی مستقبل ہونا چاہیے۔

حزب اختلاف کے قانون سازوں کی جانب سے استعفیٰ دینے کے مطالبے پر 72 سالہ سری لنکن صدر گوٹابایا راجا پاکسے نے اپنے زیادہ تر انتظامی اختیارات ترک کرنے اور نئی کابینہ کے لیے راہ ہموار کرنے کا عہد کیا ہے۔

یہ بھی پڑھیں: الجزیرہ کی خاتون صحافی کو قبرستان میں والدین کے قریب دفن کیا جائے گا

سری لنکن صدر کے بھائی مہندا راجاپکسے نے اپنے حامیوں کی جانب سے حکومت کے خلاف کئی مہینوں سے پرامن احتجاج کرنے والے مظاہرین پر حملے کیے جانے کے بعد بطور وزیر اعظم استعفیٰ دے دیا۔

یہ ایک ٹرننگ پوائنٹ ثابت ہوا کیونکہ کئی روز سے جاری افراتفری اور احتجاج میں کم از کم 9 افراد ہلاک اور 200 سے زائد زخمی ہو گئے جبکہ مہندا راجاپکسے کے وفاداروں کے کئی درجن گھروں کو آگ لگا دی۔

مزید برآں مہندا نے ٹوئٹ میں نو منتخب وزیر اعظم کو مبارکباد دی، انہوں نے یہ ٹوئٹ ملک کے مشرقی ساحل پر واقع ٹرنکومالے نیوی بیس سے کیا جہاں پر انہوں نے دارالحکومت کولمبو سے فرار ہونے کے بعد پناہ لی ہے، انہوں نے کہا کہ میں ان مشکل حالات میں حکومت سنبھالنے پر نیک خواہشات کا اظہار کرتا ہوں۔