اسٹریٹ کرائمز پر قابو پانے کا فیصلہ، کراچی میں اچانک اسنیپ چیکنگ کا آغاز

سندھ پولیس نے اسٹریٹ کرائمز پر قابو پانے کا فیصلہ کر لیا، کراچی میں مختلف مقامات پر اچانک اسنیپ چیکنگ کا آغاز کردیا گیا ہے۔ کے نائن یونٹ کے خصوصی کتے بھی آپریشن میں حصہ لے رہے ہیں۔

تفصیلات کے مطابق اسپیشل برانچ کی خصوصی ٹیموں کو کراچی کے مختلف مقامات پر اسنیپ چیکنگ کی ذمہ داری دے دی گئی۔ آئی جی سندھ غلام نبی میمن کے احکامات پر اسنیپ چیکنگ کا  سلسلہ شروع کیا گیا ہے۔

یہ بھی پڑھیں:

دعا زہرہ کیس سے متعلق عدالت کا بڑا حکم

ٹریفک پولیس سمیت دیگر متعلقہ اداروں کو بھی اسنیپ چیکنگ مشن پر لگا دیا گیا۔ ایس ایس پی اسپیشل برانچ اور متعلقہ ڈی آئی جی کی سربراہی میں اسنیپ چیکنگ کی جارہی ہے۔ مانیٹرنگ کا مقصد شہریوں کی حفاظت یقینی بنانا ہے۔

اس حوالے سے سندھ پولیس کا کہنا ہے کہ موچکو اور سسی ٹول پلازہ سمیت کراچی کے اہم مقامات پر اسنیپ چیکنگ شروع کی گئی ہے جس میں سی آر او سسٹم اور بائیو میٹرک مشینیں بھی استعمال کی جارہی ہیں۔

پولیس نے کراچی کے شہریوں سے اپیل کی ہے کہ اپنے ڈرائیونگ لائسنس اور ضروری کاغذات ساتھ رکھیں۔ کالے شیشوں کو بھی چیک کیا جائے گا جبکہ اسنیپ چیکنگ روزانہ کسی بھی وقت شروع ہوسکتی ہے۔