لوئر کرم میں 2 گروپوں میں مسلح تصادم، فائرنگ، 6 افراد ہلاک، 11 زخمی

لوئر کرم: خیبر پختونخوا کے علاقے لوئر کرم میں دوگروپوں کے مسلح تصادم کے دوران کم از کم چھ افراد ہلاک اور 11 دیگر زخمی ہوگئے۔

پولیس کے مطابق جان لیوا مسلح تصادم دو گروپوں کے درمیان زمین کے تنازع پر ہوا جس میں دونوں گروپوں نے ایک دوسرے پر آزادانہ طور پر اسلحے کا استعمال کیا جس کے نتیجے میں 6 افراد موقع پر ہی ہلاک ہوگئے جبکہ 11 دیگر زخمی ہوئے۔ اطلاع ملتے ہی پولیس امدادی ٹیموں کے ہمراہ موقع پر پہنچی اور لاشوں اور زخمیوں کو پاراچنار اسپتال منتقل کیا۔

مزید پڑھیں:چونیاں میں طالبِ علم سے زیادتی کی ویڈیو وائرل، 3 ملزمان پر مقدمہ درج، ایک گرفتار

واضح رہے کہ سال کے آغاز میں خیبر پختونخوا کے صوبائی دارالحکومت پشاور میں ایک جرگے میں فائرنگ کے ایک واقعے کے دوران پانچ افراد ہلاک ہو گئے تھے۔جرگہ دو فریقوں کے درمیان زمین کے تنازع کو حل کرنے کے لیے منعقد کیا گیا تھا۔

چند ماہ قبل پنجاب میں  کھاریاں والا کے علاقے میں بچوں کے مابین جھگڑے کے بعد دو گروہوں کے مابین تصادم کے بعد مسلح افراد کی فائرنگ سے 8 افراد ہلاک ہوگئے تھے۔

بچوں کے درمیان ہونیوالا جھگڑا بڑوں میں تصادم میں تبدیل ہونے کے بعد ایک گروہ کے ارکان نے مخالفین پر گولیاں برسادیں۔ افسوسناک واقعہ میں 8افراد موقع پر زندگی سے ہاتھ دھو بیٹھے جبکہ 3 افراد زخمی ہوگئے۔

فائرنگ کے واقعہ کے بعد متاثرہ گروہ نے فائرنگ کرنیوالوں کے مکانات کو نذر آتش کردیا جس نے صورتحال کو مزید خراب کردیا تھا۔