سندھ حکومت کا بڑے شہروں میں گندم کی بلا روک ٹوک آمدورفت کا حکم

کراچی:حکومت سندھ نے بڑے شہروں میں گندم کی بلا روک ٹوک آمدورفت کا حکم دے دیا ہے،واضح رہے کہ سندھ حکومت نے فلور ملز میں گندم کی قلت کے پیش نظر کراچی اور حیدرآباد میں گندم کی بلا روک ٹوک آمدورفت کا حکم دیا ہے۔

محکمہ خوراک سندھ کی جانب سے جاری نوٹس کے مطابق کراچی اور حیدرآباد کی فلور ملوں کو گندم پہنچانے والی کسی بھی گاڑی کو محکمہ فوڈ کے عہدیداروں کے ذریعے نہیں روکا جائے گا۔

اس حوالے سے وزیر اعظم کے مشیر برائے ساحلی امورمحمود مولوی نے ٹویٹ کیا،جس میں انہوں نے کہا کہ ”الحمد اللہ میری کل کی پریس کانفرنس کے بعد سندھ فوڈ ڈیپارٹمنٹ نے میرے موقف کی تائید کرتے ہوئے کراچی میں گندم کی ضلع بندی کو کھول دیا ہے، مگر اب بھی اطلاعات ہیں کہ کچھ عناصر گندم کی ترسیل میں رکاوٹیں پیدا کررہے ہیں۔وزیر اعلیٰ سندھ گندم کی بلا رکاوٹ ترسیل کی ہدایات جاری کریں تاکہ قیمتیں کم ہوسکیں “۔

Sindh Food Department while endorsing my stance has opened "Zila Bandi" of wheat for Karachi

But, some elements are trying to obstruct the arrival of wheat. CM Sindh should issue instructions for unhindered transportation so that prices can be reduced & common man can get relief

— Mahmood Moulvi (@MoulviMahmood) June 8, 2020

واضح رہے کہ اتوار کے روزپریس کانفرنس کے دوران مشیر برائے ساحلی امور محمود مولوی نے بڑے شہروں میں گندم کی بڑھتی قیمتوں پر حکومت سندھ کو تنقید کا نشانہ بنایا تھا، پریس کانفرنس میں انہوں نے کہا تھا کہ صوبائی حکومت فلور ملز اور اس کاروبار سے وابستہ دیگر افراد کو گندم کی عدم فراہمی کی ذمہ دار ہے۔

ان کا کہنا تھا کہ صوبائی حکومت کی نااہلی نے گندم کے بحران کو جنم دیا ہے، ذمہ داروں کے خلاف سخت کارروائی کی جائے۔ انہوں نے افسوس کا اظہار کرتے ہوئے کہا تھا کہ پیپلز پارٹی کے رہنما صوبے کے ساتھ ناانصافی پر شور کررہے ہیں جبکہ ناانصافی ان لوگوں نے کی تھی جنہوں نے گندم کی خریداری اور اس کی تقسیم کے دوران سرکاری فنڈز کی لوٹ مار کی تھی۔

پی ٹی آئی رہنما محمود مولوی کا مزید کہنا تھا کہ گندم کی قیمتوں کو کنٹرول کرنا بھی حکومت سندھ کی ذمہ داری ہے۔گندم (آٹا) 40 روپے فی کلو کے حساب سے سندھ کو دیا گیا تھا، لیکن یہ صوبے بھر میں 50 روپے فی کلوکے حساب سے فروخت ہورہا ہے۔