سندھ کو گیس بندش کا سامنا، سی این جی کل سے 3 روز کیلئے بندکرنیکا فیصلہ

کراچی: صوبہ سندھ کو گیس کی فراہمی بند کردی جائے گی، سی این جی اسٹیشنز کل سے 3 روزکیلئے بند کرنے کا فیصلہ کیا گیا ہے جس کے نتیجے میں شہریوں کو آمدورفت میں مشکلات کا سامنا ہوسکتا ہے۔

تفصیلات کے مطابق ایس ایس جی سی نے سندھ میں سی این جی اسٹیشنز جمعہ سے اتوارتک بند رکھنے کا فیصلہ کیا ہے۔ 15 اپریل کی صبح 8 بجے سے شہریوں کو سی این جی دستیاب نہیں ہوگی۔ اس دوران ٹرانسپورٹ کے کرایوں میں اضافے کا بھی خدشہ ہے۔

ایس ایس جی سی حکام کا کہنا ہے کہ سی این جی کی فراہمی پیر کی صبح 8 بجے سے بحال کردی جائے گی۔ 18 اپریل سے شہریوں کو سی این جی دستیاب ہوگی۔ قبل ازیں 15 مارچ کو بھی سی این جی سندھ بھر میں 3 روز کیلئے بند کردی گئی تھی۔

یہ بھی پڑھیں:شہر قائد میں آج موسم کیسا رہے گا؟ محکمہ موسمیات کی پیش گوئی

خیال رہے کہ اس سے قبل بھی گیس کی قلت کے باعث سی این جی اسٹیشن تین روز کیلئے بند کیے گئے تھے، حکام نے سی این جی اسٹیشنوں کو گیس کی سپلائی ایک بار پھر منقطع کردی اور اعلان کیا گیا تھا کہ گیس کی فراہمی 72 گھنٹوں تک بند رہے گی۔

سوئی سدرن گیس حکام کا گزشتہ ماہ 15 مارچ کے روز بھی یہ کہنا تھا کہ سی این جی اسٹیشنز کو گیس کی فراہمی 72 گھنٹے یعنی جمعہ کی صبح 8 بجے سے پیر کی صبح 8 بجے تک بند رہے گی۔ گیس بندش کے اعلانات شہریوں کی پریشانی کا باعث بن گئے۔