کالعدم تحریک لبیک کا مارچ،شیخ رشید اور نورالحق قادری کو خصوصی ٹاسک مل گیا

اسلام آباد:وزیراعظم عمران خان نے وفاقی وزیرداخلہ شیخ رشید اور وزیرمذہبی امورپیرنورالحق قادری کو کالعدم تحریک لبیک سے مذاکرات کا ٹاسک دیدیا۔

ذرائع کے مطابق وزیراعظم عمران خان نے پیر نورالحق قادری سے ٹیلیفونک رابطہ کرکے موجودہ صورتحال پر تبادلہ خیال کیا اور کالعدم تحریک لبیک کے احتجاج کے حوالے سے بات کی اوروفاقی وزیر مذہبی امور نورالحق قادری اور وزیرداخلہ شیخ رشید کو لاہور پہنچنے کی ہدایت کی ۔

ذرائع نے بتایا کہ وزیراعظم کی ہدایت پرپیر نور الحق قادری کراچی سے لاہور پہنچے اور وزیراعظم کی ہدایت پر حکومتی ٹیم نے لاہور میں ٹی ایل پی سے مذاکرات کا فیصلہ کیا۔وفاقی پیر نورالحق قادری نے موجودہ صورتحال کے حوالے سے علمائے کرام سے ٹیلیفونک رابطے کئے ہیں۔

وفاقی وزیر پیر نور الحق قادری کا کہنا ہے کہ حکومت مذاکرات کے ذریعے معاملات کو حل کرنے پر یقین رکھتی ہے، عوام کی مال و جان کا تحفظ حکومت کی اولین ترجیح ہے۔

مزید پڑھیں:
ٹی ایل پی کا احتجاج، اسلام آباد میں پیراملٹری فورس تعینات کردی گئی

لاہور میں کالعدم تحریک لبیک کا احتجاج، 3پولیس اہلکار جاں بحق

کراچی کے مختلف علاقو ں میں کالعدم تحریک لبیک کا احتجاج شروع ہونیکا امکان

وفاقی وزیرداخلہ شیخ رشید کالعدم ٹی ایل پی سے مذاکرات کے لئے لاہور پہنچے۔وزیر داخلہ وزیر اعلی پنجاب عثمان بزدار کے خصوصی طیارے میں لاہور روانہ ہوئے تو ان کے ہمراہ وزیر برائے امور کشمیر و گلگت بلتستان علی امین گنڈا پور بھی تھے۔

دوسری جانب وزیر داخلہ شیخ رشید نے کالعدم ٹی ایل پی کے احتجاج سے نمٹنے کے لئے پنجاب، خیبرپختونخوا اور آزاد کشمیر سے پولیس فورس مانگ لی ہے۔

وزارت داخلہ نے پنجاب، خیبرپختونخوا اور آزاد کشمیر کے چیف سیکریٹریوں کو اسلام آباد کی سیکورٹی کے لئے اینٹی رائٹ فورس دستے بھجوانے کے لئے مراسلے بھیج دیئے ہیں، جس میں کہا گیا ہے کہ پنجاب، خیبرپختونخوا اور آزاد کشمیر 10،10 ہزار نفری پر مشتمل پولیس دستے اسلام آباد بھیجیں۔