غیر ملکی سازش منحرف اراکین میں ڈالرز کی تقسیم سے شروع ہوئی۔شیخ رشید

اسلام آباد: سابق وفاقی وزیرِ داخلہ شیخ رشید احمد نے کہا ہے کہ فضل الرحمان کا سازش کا اعتراف بھونڈا مذاق ہے جبکہ عمران خان کے خلاف غیر ملکی سازش تو منحرف اراکین میں ڈالرز کی تقسیم سے شروع ہوئی تھی۔

سماجی رابطے کی ویب سائٹ ٹؤئٹر پر اپنے پیغام میں عوامی لیگ کے سربراہ شیخ رشید احمد نے کہا کہ فضل الرحمان کا سازش کا اعتراف بھونڈا مذاق ہے۔ سازش غیر ملکی ڈالرز کے منحرف اراکین میں تقسیم سے شروع ہوئی۔ ہر روز 10 شعبوں میں نیا ٹیکس لگایا جاتا ہے۔

یہ بھی پڑھیں:

سازش کامیاب نہیں ہونے دیں گے، فضل الرحمان 

ٹوئٹر پیغام میں سابق وفاقی وزیر شیخ رشید نے موجودہ حکومت پر تنقید کرتے ہوئے کہا کہ ابھی نہ تو آئی ایم ایف کا فیصلہ آیا ہے اور نہ ہی ایف اے ٹی ایف نے گرے لسٹ سے نکالا ہے۔ وزیر اعظم، وزیر اعلیٰ منشیات کیس میں وزیرِ داخلہ رانا ثناء اللہ پر فردِ جرم کون عائد کرے گا؟

سابق وزیرِ داخلہ شیخ رشید احمد نے سیاسی پیشگوئی کرتے ہوئے کہا کہ جولائی پاکستان کی سیاست کا اہم ترین مہینہ ہے۔ ن لیگ نے 20ضمیر فروش منحرف اراکین کو ٹکٹ دے کر ووٹ کو عزت دو کے بیانیے پر مہر لگائی ہے۔ قومی غیرت ان منحرف اراکین کو مسترد کرنا ہے۔ 

عوامی لیگ کے سربراہ شیخ رشید احمد نے کہا کہ حکومت نے چوہدریوں کو لڑا دیا، ایم کیو ایم کو لائن میں لگا دیا، بی اے پی اور اے این پی کو بٹھا دیا، ابھی ٹریلر چلا ہے۔ اتحادیوں کی فلم چلنا ابھی باقی ہے۔