جولائی کا مہینہ اہم ہے، عمران خان کے جلسے کیلئے نکلوں گا۔شیخ رشید

اسلام آباد: سابق وزیرِ داخلہ شیخ رشید احمد نے کہا ہے کہ اتحادی حکومت میں جو کچرا اکٹھا ہوا ہے، عمران خان ایک ٹھوکر میں ڈھیر کردے گا۔ جولائی کا مہینہ اہم ہے۔ بھاگوں گا نہیں، عمران خان کے جلسے کیلئے نکلوں گا۔

تفصیلات کے مطابق میڈیا سے گفتگو کرتے ہوئے عوامی لیگ کے سربراہ شیخ رشید احمد نے کہا کہ لوٹوں کو نااہل ہونا چاہئے، ان کی کوئی حیثیت نہیں۔ ن لیگ نے جن لوٹوں کو ٹکٹ دیا، سب نااہل ہونے چاہئیں۔ حکومت مہنگائی پر قابو پانے آئی تھی، مہنگائی نے اسے کنٹرول کر لیا۔

یہ بھی پڑھیں:

کنور نوید جمیل 10گھنٹے آپریشن کے بعد آئی سی یو منتقل

گفتگو کے دوران سابق وزیرِ داخلہ نے کہا کہ اگر حکومت مجھے گرفتار کرنا چاہتی ہے تو شوق سے کر لے۔ میں عمران خان کے ساتھ 2 جولائی کے جلسے کیلئے گھر سے نکلوں گا۔ عمران خان جولائی کے دوران پر امن جلسہ کرنے جا رہے ہیں۔

سابق وفاقی وزیر شیخ رشید احمد نے کہا کہ چین میں ترقی پذیر ممالک کی کانفرنس ہوئی، پاکستان کو نہیں بلایا گیا۔ کراچی میں 2 انتخاب ہوئے اوردونوں میں گولیاں چل گئیں۔ اگرکسی جگہ پی ٹی آئی کو ہرانے کی کوشش کی تو یہ لوگ نہیں چھوڑیں گے۔

وفاقی حکومت پر تنقید کرتے ہوئے شیخ رشید احمد نے کہا کہ اتحادیوں میں سے بعض ان سے نالاں ہیں۔ گزشتہ روز سابق میئر کراچی وسیم اِختر نے کہا کہ بہت ہوگیا۔ بی اے پی، شیر پاؤ گروپ اور دیگر جماعتیں نظر نہیں آرہیں۔جولائی کا مہینہ اہم ہے۔

سربراہ عوامی لیگ نے کہا کہ عید سے پہلے بہت اہم دن ہیں۔ انتخابات کروا کر غیر ملکی ایجنڈے سے ہونے والی تباہی سے بچا جاسکتا ہے۔ اگر منصفانہ الیکشن کرائے جائیں تو سب مسئلے حل ہوجائیں گے۔ میں بھاگوں گا نہیں، عمران خان کے جلسے کیلئے نکلوں گا۔