منی لانڈرنگ کیس، شہباز شریف کی حاضری سے استثنیٰ کی درخواست منظور

لاہور: احتساب عدالت نے منی لانڈرنگ کیس میں وزیر اعظم شہباز شریف کی حاضری سے استثنیٰ دینے کی درخواست منظور کر لی ہے۔ شہباز شریف پر فردِجرم عائد کرنے کا عمل ملتوی کردیا گیا۔

تفصیلات کے مطابق منی لانڈرنگ کیس کی سماعت احتساب عدالت لاہور میں ہوئی۔ وزیر اعلیٰ پنجاب کیلئے ن لیگی امیدوار حمزہ شہباز عدالت میں پیش ہوئے تاہم ان کے والد اور وزیر اعظم شہباز شریف نے پیش ہونے سے معذرت کر لی۔

یہ بھی پڑھیں:

شہباز شریف کی زیر صدارت ہنگامی اجلاس، پیٹرولیم اور بجلی کے بحران پر گفتگو

خیال رہے کہ شہباز شریف آج 1 روزہ دورے کیلئے کراچی پہنچیں گے جہاں وزیر اعلیٰ سندھ مراد علی شاہ، صوبائی وزراء، پیپلز پارٹی اور اتحادی جماعتوں کے رہنماؤں سے ملاقاتیں کریں گے۔ اس دوران ن لیگی رہنماؤں کی بھی  شہباز شریف سے ملاقات متوقع ہے۔

احتساب عدالت لاہور نے شہباز شریف کے وکلاء کی جانب سے جمع کرائی گئی حاضری سے استثنیٰ دینے کی درخواست منظور کرلی تاہم کیس پر مزید کارروائی جاری رہی۔ قومی احتساب بیورو (نیب) کے 6 گواہان کے بیانات قلمبند کرلیے گئے۔

دوسری جانب حمزہ شہباز پنجاب میں وزیر اعلیٰ بننے کیلئے پر عزم ہیں۔ ایک صحافی نے حمزہ شہباز سے پوچھا کہ پنجاب میں نمبر گیم کی کیا صورتحال ہے؟ ن لیگی امیدوار نے کہا کہ اللہ نے چاہا تو ہماری نمبر گیم پوری ہوگی۔