منی لانڈرنگ کیس، وزیر اعظم اور حمزہ شہباز کی ضمانتوں میں 14مئی تک توسیع

لاہور: عدالت نے وزیر اعظم میاں شہباز شریف اور نو منتخب وزیر اعلیٰ پنجاب حمزہ شہباز کی ضمانتوں میں 14 مئی تک توسیع کی منظوری دے دی ہے۔

تفصیلات کے مطابق آج احتساب عدالت لاہور میں ن لیگ کے صدر و وزیر اعظم شہباز شریف اور نو منتخب وزیر اعلیٰ حمزہ شہباز کے خلاف منی لانڈرنگ کیس کی سماعت ہوئی۔ اس موقعے پر وزیر اعظم میاں شہباز شریف کی جانب سے حاضری سے استثنیٰ دینے کی درخواست دائر کی گئی۔

یہ بھی پڑھیں:

پنجاب کے مختلف شہروں میں ڈیزل بحران برقرار، وزیراعظم کا نوٹس

احتساب عدالت نے وزیرا عظم کے وکیل سے استفسار کیا کہ حاضری سے استثنیٰ کی درخواست کب تک دی جاتی رہے گی؟ معزز جج نے حکم جاری کیا کہ شہباز شریف منی لانڈرنگ کیس میں آئندہ اپنی حاضری یقینی بنائیں۔ وکیل امجد پرویز نے حاضری سے استثنیٰ کی درخواست کے حق میں دلائل دئیے۔

وزیر اعظم کے وکیل نے کہا کہ اس کیس میں فردِ جرم عائد نہیں کی جاسکتی، اس پر درخواست دائر کرنا چاہتے ہیں۔ معزز جج نے ریمارکس دئیے کہ آئندہ سماعت پر شہباز شریف کے وکیل دلائل پیش کریں یا پھر فردِ جرم عائد کی جائے گی۔ بعد ازاں حمزہ شہباز اور شہباز شریف کی ضمانتوں میں 14مئی تک توسیع کردی گئی۔

خیال رہے کہ وزیر اعظم شہباز شریف 3 روزہ دورے کیلئے کل سعودی عرب روانہ ہوں گے۔ اس موقعے پر ان کے ہمراہ وفاقی وزراء اور اعلیٰ سطحی حکام کا ایک وفد بھی ریاض پہنچے گا۔ وفد میں شامل افراد کی فہرست تیار کر لی گئی۔ دورے میں 53 ارکان شامل ہوں گے جبکہ دورہ 28 سے 30 اپریل تک جاری رہے گا۔