عمران خان ایک ضدی اور ڈھیٹ آدمی ہے، جس کا کوئی علاج نہیں، شہباز شریف

مسلم لیگ (ن) کے صدر اور اپوزیشن لیڈر شہباز شریف نے وزیراعظم کے بیانات پر ردعمل دیتے ہوئے کہا کہ عمران خان ایک ضدی، ڈھیٹ آدمی ہے جو کہتا ہے، میں نہ مانوں اس کا کوئی علاج نہیں، اس کا ایک ہی علاج ہے کہ ہم قانون کےمطابق انھیں ہٹائیں۔

اسلام آباد میں پریس کانفرنس کے دوران شہباز شریف نے استفسار کیا کہ کیا عمران خان کو غیرملکی سازش کا آج علم ہوا؟ جب خط 7 تاریخ کو آیا تو 3 ہفتے کیوں چپ رہے؟ فوری طور پر واویلا کیوں نہ کیا؟

انہوں نے کہا کہ عمران خان نے اوآئی سی میں امریکی نمائندے کو کیوں بلایا؟ آپ یہ ڈرامے بازی کس کو دکھا رہے ہیں؟

شہباز شریف کا کہنا تھا کہ عمران خان کہتا ہے کہ بین الاقوامی سازش ہوئی ہے، خدا کا خوف کرے، یہ آخر بے وقوف کس کو بنا رہا ہے؟

انہوں نے کہا کہ جب آپ کو شکست صاف نظر آنے لگی تو آپ دھمکیاں دینے پر اُتر آئے، کیا یہ ہے آپ کی جمہوریت پسندی؟

یہ بھی پڑھیں: آرمی چیف جنرل قمر جاوید باجوہ سے زلمے خلیل زاد کی ملاقات، آئی ایس پی آر

شہباز شریف نے کہا کہ عمران خان ایک ضدی، ڈھیٹ آدمی ہے جو کہتا ہے، میں نہ مانوں اس کا کوئی علاج نہیں، اس کا ایک ہی علاج ہے کہ ہم قانون کے مطابق انھیں ہٹائیں اور قوم کی جان چھڑائیں۔

ن لیگی صدر نے مزید کہا کہ ہمارے ادوار کی ایک دہلے کی کرپشن یہ سامنے نہیں لاسکے ہیں کیونکہ ہمارے منصوبوں میں اربوں روپے کی بچت ہوئی۔

اُن کا کہنا تھا کہ ہم عام آدمی کے لیے مل کرکام کریں گے، ہماری پہلی ترجیح غریب آدمی ہے۔

شہباز شریف نے کہا کہ عمران خان کی حکومت میں کھربوں روپے کے قرضے لیے گئے، ہم آئی ایم ایف کے اسیر بن چکے ہیں۔

مزید برآں پریس کانفرنس کے دوران فون کال کے بارے میں شہباز شریف نے کہا کہ لائن پر کوئی جادوگر تھا نہ کوئی اور، میرے ساتھ اللہ کا ایک بندہ تھا بعدازاں انہوں نے کہا کہ میاں صاحب اپنے علاج کے بعد جلد از جلد واپس آئیں گے۔

دریں اثناء اپوزیشن لیڈر نے مزید کہا کہ میں تو عمران کی تقریر سنتا ہی نہیں، لیڈر آف دی اپوزیشن ہوں اور مجھے معلومات تو مل جاتی ہے۔