دعا زہرا کیس، سندھ ہائیکورٹ کا ملزمان کے شناختی کارڈ بلاک کرنیکا حکم

کراچی: سندھ ہائیکورٹ نے دعا زہرا کیس میں نامزد ملزمان کے شناختی کارڈ بلاک کرنے کا حکم جاری کردیا ہے۔ عدالت میں بازیابی کیس کی سماعت کے دوران دعا زہرا کے بیرونِ ملک منتقل ہوجانے کا خدشہ ظاہر کیا گیا تھا۔

تفصیلات کے مطابق سندھ ہائیکورٹ نے نیشنل ڈیٹا بیس اینڈ رجسٹریشن اتھارٹی (نادرا) اور اسٹیٹ بینک کو نامزد ملزمان کے بینک اکاؤنٹس منجمد کرکے شناختی کارڈ بھی بلاک کرنے کی ہدایت کی۔

یہ بھی پڑھیں:

لیاقت اشرف کالونی میں آوارہ کتوں کے حملے میں 2بچے شدید زخمی

آئی جی سندھ غلام نبی میمن اور دیگر حکام آج سندھ ہائیکورٹ میں دعا زہرا کی بازیابی سےمتعلق درخواست کی سماعت کے دوران پیش ہوئے۔ کراچی سے گمشدہ دعا زہرا آج بھی عدالت میں پیش نہ ہوسکیں۔

اس موقعے پر آئی جی غلام نبی میمن نے عدالت کو آگاہ کیا کہ خیبر پختونخوا اور پنجاب میں اور تکنیکی طور پر کیس کیلئے 10 ٹیمیں کام کر رہی ہیں۔ 10 افراد گرفتار ہوئے جبکہ 3 کو چھوڑ دیا گیا۔

آئی جی سندھ نے کہا کہ ایک ملزم حفاظتی ضمانت پر ہے۔ 12 افراد تاحال گرفتار ہیں جن میں سے 2 کراچی منتقل ہوئے ہیں۔ سندھ ہائیکورٹ نے ریمارکس دئیے کہ دعا زہرا کے بارے میں پتہ نہیں چلا؟

سندھ پولیس کی جانب سے عدالت کو آگاہ کیا گیا کہ کچھ شواہد دستیاب ہوئے ہیں۔ عدالت نے استفسار کیا کہ کیا یہ انسانی اسمگلنگ کا کیس ہے؟ آئی جی سندھ نے کہا کہ ایسا کوئی معاملہ نہیں۔

انسپکٹر جنرل سندھ پولیس غلام نبی میمن نے کہا کہ لڑکے ظہیر کے والد یونیورسٹی رجسٹرار کے ڈرائیور ہیں۔ سندھ ہائیکورٹ نے ریمارکس دئیے کہ جب تک دعا زہرا نہیں آئے گی کیس چلتا رہے گا۔

 دعا زہرا کے والد کا کہنا تھا کہ بڑی امید لگا کر آتا ہوں۔ عدالت نے ایف آئی اے اور وفاقی حکومت کو فریق بنانے کے علاوہ سرحدی علاقوں کی نگرانی کا حکم بھی جاری کردیا۔

سندھ ہائیکورٹ کا کہنا تھا کہ لڑکی کو بیرونِ ملک منتقل ہونے سے روکا جائے۔ نادرا اور اسٹیٹ بینک کو ملزمان کے اکاؤنٹس منجمد اور شناختی کارڈ بلاک کرنے کا حکم دیتے ہوئے سماعت 10جون تک ملتوی کردی۔