وزیراعظم نے خود اعتراف کیا کہ انہیں آٹے کی قیمت پر گمراہ کیا گیا، شہبازشریف

لندن: مسلم لیگ (ن) کے صدر شہبازشریف کا کہنا ہے کہ وزیراعظم نے خود اعتراف کیا کہ انہیں آٹے کی قیمت پر گمراہ کیا گیا، انہیں چاہیے کہ وہ آٹا اور چینی چوروں سے تحفے اور مفاد لینا بند کردیں۔

مسلم لیگ (ن) کے صدر شہبازشریف کا کہنا تھا کہ پتہ چلایاجائے کہ درست تخمینے کے بجائے گندم کی پیداوارکس نے بڑھا چڑھا کر پیش کی اور وزارت خوراک کی مخالفت کے باوجود ای سی سی نے گندم بر آمد کرنے کی اجازت کیوں دی؟۔

انہوں نے کہا کہ وزیراعظم نے خود اعتراف کیا کہ انہیں آٹے کی قیمت پر گمراہ کیا گیا، عمران خان نیازی کو چاہئے کہ آٹا اور چینی چوروں سے تحفے اور مفاد لینا بند کردیں۔

یہ بھی پڑھیں: ہم نے 30 غیر ضروری کمپنیوں کو بند کرنے کا فیصلہ کیا ہے۔وزیرِ اعلیٰ پنجاب

شہباز شریف کا کہنا تھا کہ قوم کو بتایا جائے کہ قیمت میں اضافے، آٹا اور گندم کے ذخیرہ اندوزی سے فائدہ اٹھانے والے کون ہیں؟، پنجاب اور وفاقی حکومت کی آنکھیں اس وقت کیوں بند تھیں جب مقامی مارکیٹ کا آٹا سمگل کیا جارہا تھا؟۔