عمران خان نے پاکستان کے دوستوں کو ناراض کردیا۔ شہباز شریف

اسلام آباد: صدر ن لیگ و قائدِ حزبِ اختلاف قومی اسمبلی شہباز شریف نے کہا ہے کہ وزیر اعظم عمران خان نے پاکستان کے دوستوں کو ناراض کردیا ہے جبکہ عالمی طاقتوں سمیت سب ممالک سے احترام کی بنیاد پر تعلقات بنانے چاہئیں۔

تفصیلات کے مطابق وزیر اعظم کی تقریر پر ردِ عمل دیتے ہوئے اپنے ایک بیان میں اپوزیشن لیڈر شہباز شریف نے کہا کہ پاکستان کے سفارتی تعلقات سے عوام کے معاشی تعلقات وابستہ ہیں۔ عمران نیازی کی حماقتوں نے پاکستان کے مفادات پر ضرب لگائی۔

  یہ بھی پڑھیں:

ہار نہیں مانوں گا، آخر تک لڑوں گا، وزیر اعظم عمران خان

بیان میں ن لیگ کے صدر شہباز شریف نے وزیر اعظم کے خطاب پر تنقید کرتے ہوئے  کہا کہ تقریر کے شوق میں وزیر اعظم نے پاکستان کیلئے نئی مشکلات پیدا کرنے کی کوشش کی۔ بدتہذیبی کا نام آزاد خارجہ پالیسی نہیں ہوتا۔ 

وزیر اعظم نے کیا کہا تھا؟

یاد رہے کہ اس سے قبل وزیر اعظم عمران خان نے قوم سے براہ راست خطاب کرتے ہوئے کہا کہ مجھے سیاست میں آنے کی ضرورت کیا تھی؟ میرے پاس اللہ پاک کا دیا ہوا سب کچھ ہے۔ میں صرف اس ملک کی خاطر سیاست میں آیا۔

گزشتہ روز اپنے خطاب میں وزیر اعظم نے کہا کہ مجھ سے بہت سے لوگوں نے کہا کہ عمران صاحب آپ کو سیاست میں آنے کی کیا ضرورت تھی؟ ہم دوسرے خداؤں کی پوجا کرتے ہیں، یعنی ہم پیسے کی پوجا کرتے ہیں۔