اسلام آباد: سابق وزیراعظم نواز شریف کو پاسپورٹ کی میعاد ختم ہونے پر کسی پریشانی کا سامنا نہیں ہوگا، ان کیلئے مناسب، باعزت اور قانونی آپشن موجود ہیں، سعودی فرمانروا شاہ سلمان نے نواز شریف کو سعودی عرب آنے اور ملاقات کی دعوت کا پیغام بھجوایا ہے۔
سعودی فرمانروا شاہ سلمان نے کہا ہے کہ اگر سابق وزیر اعظم نواز شریف مستقل طور پر سعودی عرب رہنا چاہیں تو سعودی عرب ان کا خیرمقدم کرے گا۔ قوی امکان ہے کہ نواز شریف مستقل طور پر نہ سہی لیکن عمرہ کی ادائیگی اور سعودی حکمرانوں شاہ سلمان اور محمد بن سلمان سے ملاقات کیلئے جلد سعودی عرب کا دورہ کریں گے۔
ذرائع کے مطابق نواز شریف کے دورے کے پیش نظر نواز شریف کے اسٹاف افسر، حسین نواز کے ذاتی دوست، اسکول فیلو و دیگر اسٹاف کے ہمراہ سعودی عرب پہنچ گئے ہیں جہاں پر وہ نوازشریف کی حسین نواز کی رہائش گاہ پر قیام کے انتظامات میں مصروف ہیں۔ سعودی عرب دورے کے دوران نواز شریف کا مسکن اپنے بیٹے حسین نواز کا گھر ہوگا۔
رپورٹ کے مطابق برطانوی وزارت خارجہ نے بھی نواز شریف کو گرین سگنل دیدیا ہے کہ آپ اپنا علاج مکمل ہونے تک لندن میں پاسپورٹ کی میعاد ختم ہونے کے باوجود رہ سکتے ہیں، برطانوی قوانین کے تحت ساٹھ سال سے زائد عمر کا شخص جو علاج کی غرض سے برطانیہ میں موجود ہو، پاسپورٹ یا ویزا ختم ہونے کے ڈیڑھ سال بعد تک فیملی سمیت رہ سکتا ہے۔
نواز شریف سعودی حکمرانوں سے ملاقات، عمرہ کیلئے سعودی عرب ضرور جائیں گے لیکن مستقل رہائش لندن میں ہی رکھیں گے، آخری آپشن کے طور پر امریکا منتقلی پر غور کیا گیا ہے تاہم اس کے امکانات کم ہیں لیکن ان کے ذاتی اور کاروباری دوست شیخ سعید ممکنہ انتظامات کیلئے منصوبہ بندی کرچکے ہیں۔
سابق وزیر اعظم کے پاس ایک سے زائد چوائس موجود ہے۔ وہ اگر قطر منتقل ہونا چاہیں تو وہاں کے حکمرانوں سے سیف الرحمان بات کرچکے ہیں جنہوں نے نواز شریف کی متوقع آمد کا خیرمقدم کیا ہے، اس بات کا امکان بہت کم ہے کہ نواز شریف لندن چھوڑ کر امریکا، سعودیہ یا قطر منتقل ہو جائیں البتہ وہ عمرہ کی ادائیگی کیلئے سعودی عرب ضرور جائیں گے۔
گوگل نیوز پر ہمیں فالو کریں
