بلوچستان میں سیکورٹی فورسز کے 7 جوان شہید ہو گئے۔آئی ایس پی آر کی تصدیق

راولپنڈی: پاک فوج کے شعبۂ تعلقاتِ عامہ (آئی ایس پی آر) نے کہا ہے کہ سیکورٹی فورسز کو بلوچستان میں 2 مختلف واقعات پیش آئے جن کے دوران 7 جوانوں نے جامِ شہادت نوش کر لیا۔

تفصیلات کے مطابق یہ دونوں واقعات بلوچستان کے مختلف علاقوں میں پیش آئے۔ بلوچستان کے علاقے مچھ میں گزشتہ رات فرنٹیئر کارپس (ایف سی) کی گاڑی کے ساتھ حادثہ پیش آگیا۔

پاک فوج کے شعبۂ تعلقاتِ عامہ کے مطابق ایف سی کی گاڑی بارودی سرنگ سے ٹکرانے کے باعث جے سی او کے ساتھ ساتھ 6 جوانوں نے جامِ شہادت نوش کر لیا۔

شعبۂ تعلقاتِ عامہ کے مطابق نائیک زبیر خان، نائب صوبیدار احسان اللہ خان، نائیک مولا بخش، نائیک اعجاز احمد، نائیک نور محمد اور ڈرائیور عبدالجبار شہداء میں شامل ہیں جبکہ دوسرا واقعہ کیچ میں پیش آیا۔

بلوچستان کے علاقے کیچ میں دہشت گردوں کے ساتھ فائرنگ کے تبادلے میں سپاہی امداد علی جامِ شہادت نوش کر گئے جبکہ تمام شہداء کو اعزاز و اکرام کے ساتھ دفن کیا جائے گا۔