گوگل نیوز پر ہمیں فالو کریںشہرِ قائد کے سب سے بڑے جناح ہسپتال کی سابق ایگزیکٹو ڈائریکٹر ڈاکٹر سیمی جمالی آج سے ٹھیک ایک برس قبل انتقال کرگئیں، آج ڈاکٹر سیمی جمالی کی پہلی برسی منائی جارہی ہے۔
گزشتہ برس ڈاکٹر سیمی جمالی کے انتقال کی خبر کراچی کے باسیوں پر بجلی بن کر گری۔ سابق ایگزیکٹو ڈائریکٹر جناح ہسپتال سیمی جمالی کئی روز سے نجی اسپتال میں بیماری کے سبب زیر علاج اور کینسر جیسے موذی مرض کا شکار تھیں۔
مئی 2023 کے دوران جناح ہسپتال کی سابق ایگزیکٹو ڈائریکٹر ڈاکٹر سیمی جمالی کی نماز جنازہ ان کے انتقال کے اگلے روز بعد نماز عصر جناح ہسپتال کی مسجد میں ادا کرنے کا فیصلہ کیا گیا۔ڈاکٹر سیمی جمالی کی نمازِ جنازہ میں عوام کی بڑی تعداد نے شرکت کی۔
ڈاکٹر سیمی جمالی نے تھائی لینڈ سے ماسٹرآف پبلک ہیلتھ منیجمنٹ کی ایڈوانس ڈگری حاصل کی اور 1988 میں بطور آر ایم او جے پی ایم سی جوائن کیا، ڈاکٹرسیمی جمالی نے نوابشاہ سے میڈیکل کی تعلیم مکمل کی تھی۔
ایگزیکٹو ڈائریکٹر جناح ہسپتال بننے سے قبل ڈاکٹر سیمی جمالی کو1995 میں جے پی ایم سی کے شعبہ حادثات کا انچارج مقررکیاگیا، وہ 2010 میں جے پی ایم سی کی جوائنٹ ایگزیکٹو ڈائریکٹر بنیں، پھر 6 سال بعد وہ ایگزیکٹو ڈائریکٹر کے عہدے پر فائز ہوئیں۔
