ڈپٹی اسپیکر رولنگ کیس، نعیم بخاری اور اٹارنی خالد جاوید آج دلائل دینگے

اسلام آباد: سپریم کورٹ میں ڈپٹی اسپیکر رولنگ از خود نوٹس کیس کی سماعت آج ہوگی جس میں اسپیکر و ڈپٹی اسپیکر کے وکیل نعیم بخاری، امتیاز صدیقی اور اٹارنی جنرل خالد جاوید خان دلائل دیں گے۔

تفصیلات کے مطابق چیف جسٹس عمر عطا بندیال کی سربراہی میں 5 رکنی ججز بینچ از خود نوٹس کیس کی سماعت کر رہا ہے۔ گزشتہ سماعت کے دوران ریمارکس دیتے ہوئے عدالتِ عظمیٰ کا کہنا تھا کہ بظاہر عدم اعتماد کی تحریک کامیاب ہونے والی تھی۔

یہ بھی پڑھیں:

عدالت کی توجہ صرف ڈپٹی اسپیکر کی رولنگ پر ہے۔ سپریم کورٹ

سپریم کورٹ نے ریمارکس دئیے کہ جس دن وزیر اعظم عمران خان کے خلاف تحریکِ عدم اعتماد پر ووٹنگ ہونی تھی، اسی روز رولنگ آگئی۔ درخواست گزاروں کے مطابق کیس آئینِ پاکستان کی خلاف ورزی کا ہے جس پر سپریم کورٹ مداخلت کرسکتی ہے۔

چیف جسٹس عمر عطا بندیال نے کہا کہ کوشش ہے یہ معاملہ جلد مکمل کیا جائے اور کیس نمٹایا جائے۔کیس کی سماعت کرنے والے 5 رکنی ججز بینچ میں جسٹس اعجاز الاحسن، جسٹس منیب اختر، جسٹس محمد علی مظہر اور جسٹس جمال مندوخیل شامل ہیں۔ 

قبل ازیں سپریم کورٹ نے پی ٹی آئی کے وکیل بابر اعوان کی اِن کیمرا بریفنگ کی استدعا مسترد کردی تھی۔ ن لیگ کے وکیل مخدوم علی خان نے بھی عدالت کو تجویز پیش کی تھی کہ انٹیلی جنس چیف سے غیر ملکی سازش پر ان کیمرا بریفنگ طلب کی جائے۔