اسلام آباد: ترجمان دفترِ خارجہ عائشہ فاروقی نے اعلان کیا ہے کہ دفترِ خارجہ میں ”سائنس برائے استحکام و ترقی“ کے عنوان سے 2 روزہ نمائش کا انعقاد عمل میں لایا جائے گا۔

سماجی رابطے کی ویب سائٹ ٹوئٹر پر گزشتہ روز اپنے پیغام میں دفترِ خارجہ کی ترجمان عائشہ فاروقی نے کہا کہ دفترِ خارجہ میں پی اے ای سی، سپارکو، این سی پی، نسٹ، لمز اور سی یو آئی کے تعاون سے نمائش منعقد کی جائے گی۔

اپنے پیغام میں ترجمان دفترِ خارجہ عائشہ فاروقی نے کہا کہ دو روزہ نمائش کا انعقاد 16اور 17 مارچ کو پاک چین فرینڈشپ سینٹر کے مقام پر عمل میں لایا جائے گا جس کا عنوان ”سائنس برائے استحکام و ترقی“ ہوگا۔

ترجمان دفترِ خارجہ نے کہا کہ نمائش عوام کے لیے 16 مارچ کو 1 بجے دوپہر سے 5 بجے شام تک جبکہ 17 مارچ کو 10 بجے صبح سے شام 5 بجے تک کھلی رہے گی۔

عائشہ فاروقی نے کہا کہ نمائش میں سائنس و ٹیکنالوجی، ایجادات اور دریافتوں کے حوالے سے معلومات رکھی جائیں گی جبکہ پاکستان میں ٹیکنالوجی کے حوالے سے تیار کی گئی مصنوعات کے لیے عالمی منڈیاں تلاش کرنا بھی ہمارا مقصد ہے۔