اے پی ایس حملہ کیس: سپریم کورٹ نے عملدرآمد رپورٹ کیلئے حکومت کو مزیدمہلت دیدی

اسلام آباد :سپریم کورٹ نے آرمی پبلک اسکول پرحملے سے متعلق عملدرآمد رپورٹ جمع کرانے کیلئے حکومت کو مزید 3 ہفتو ں کی مہلت دیدی ہے۔

عدالت عظمیٰ نے آج وفاقی حکومت کی درخواست منظور کرلی ہے اور ممکنہ طور پر عدالت میں موسم سرما کی تعطیلات کے بعد ہی اب کیس کی کارروائی دوبارہ شروع ہو گی۔

واضح ہے کہ 16 دسمبر 2014 کو طالبان دہشت گردوں نے آرمی پبلک اسکول پر دھاوا بولا اور 130 سے زائد اسکول کے بچوں سمیت تقریباً 150 افراد کو شہید کیا تھا۔

یاد رہے کہ 10 نومبر کو سپریم کورٹ نے وزیر اعظم عمران خان سے سوال و جواب کے بعد آرمی پبلک اسکول کیس کی سماعت 4 ہفتوں تک ملتوی کردی تھی۔

وزیر اعظم عمران خان سانحہ اے پی ایس از خود نوٹس کیس میں سپریم کورٹ کے روبرو پیش ہوئے۔ عدالت نے استفسار کیا کہ سانحہ آرمی پبلک اسکول کے بعد آپ نے کیا کیا؟وزیر اعظم نے کہا کہ ہماری اس وقت صوبے میں حکومت تھی۔اس وقت جو اقدامات اٹھائے جاسکتے تھے، اٹھائے۔

مزید پڑھیں:سانحہ اے پی ایس سیکورٹی کی ناکامی قرار، رپورٹ جاری کردی گئی

جسٹس اعجاز الاحسن نے کہا کہ آرمی پبلک اسکول میں شہید ہونے والے بچوں کے والدین کو تسلی دینا ضروری ہے۔ وزیر اعظم نے کہا کہ جب یہ واقعہ ہوا تو میں فوری طور پر پشاور پہنچا۔ چیف جسٹس نے استفسار کیا کہ ریاست نے بچوں کے والدین کو انصاف دلانے کیلئے کیا کیا؟ ان کی حفاظت ریاست کی ذمہ داری تھی۔

وزیر اعظم عمران خان نے کہا کہ اس وقت میں حکومت میں نہیں تھا۔ سپریم کورٹ کے معزز جج نے ریمارکس دئیے کہ والدین چاہتے ہیں کہ اس وقت کے اعلیٰ حکام کے خلاف کارروائی کی جائے۔ اتنے سال گزر جانے کے باوجود بھی واقعے کے ذمہ داروں کو گرفتار کیوں نہ کیا جاسکا؟ اب تو آپ کی حکومت ہے۔