گوگل نیوز پر ہمیں فالو کریںپاکستان کرکٹ ٹیم کے اوپنر امام الحق کا ایک ویڈیو کلپ سوشل میڈیا پر وائرل ہو رہا ہے جس میں وہ وائٹ بال ٹیم کے کپتان محمد رضوان کی قیادت کے انداز پر تبصرہ کر رہے ہیں۔
ایک پوڈکاسٹ کے دوران میزبان روحا ندیم نے امام الحق سے کہا کہ وہ ٹیم کے کھلاڑیوں کو مختلف خصوصیات سے جوڑیں۔ جب لیڈر کا ذکر آیا تو امام نے کہا، مجھے اس وقت کسی کا نام یاد نہیں آ رہا، سب ہی آپس میں جھگڑ رہے ہیں۔
کچھ لمحے توقف کے بعد انہوں نے محمد رضوان کو لیڈر قرار دیا اور کہا کہ وہ نماز کے وقت سب کو اکٹھا کرنے کی صلاحیت رکھتے ہیں۔
مزید وضاحت کرتے ہوئے امام نے بتایا کہ رضوان تمام انتظامات خود سنبھالتے ہیں، جیسے کہ نماز کے لیے کمرہ تلاش کرنا، وہاں سفید چادریں بچھانا اور غیر مسلم ہوٹل ملازمین کے داخلے پر پابندی لگانا۔
انہوں نے مزید کہا کہ رضوان عام طور پر ایک واٹس ایپ گروپ بناتے ہیں اور اس میں نماز کے اوقات شیئر کرتے ہیں۔ یہ سب کچھ رضوان کرتے ہیں، اسی لیے میں کہوں گا کہ ان میں قیادت کی بہترین خوبیاں موجود ہیں۔
پوڈکاسٹ کے دوران جب امام سے ٹیم کے فٹنس ایکسپرٹ کے بارے میں پوچھا گیا تو انہوں نے فوری طور پر جواب دیا کہ ریڈ بال ٹیم کے کپتان شان مسعود ہمیشہ سے ہی فٹنس ایکسپرٹ رہے ہیں۔
میزبان نے کہا، لگتا ہے کہ وہ ایک باقاعدہ فٹنس روٹین فالو کرتے ہیں۔ اس پر امام نے جواب دیا کہ مسعود کے پاس جدید ترین ٹریننگ تکنیک ہے اور وہ انہیں ٹیم میں متعارف کراتے رہتے ہیں۔ وہ فٹنس فریک ہیں اور بہت فٹ بھی ہیں۔
جب امام سے پوچھا گیا کہ ٹیم میں کون شادی کا مشیر ہو سکتا ہے تو انہوں نے ہنستے ہوئے کہا کہ محمد رضوان اور آل راؤنڈر افتخار احمد ٹیم کے میریج کاؤنسلرز ہیں۔ رضوان سب کو شادی کا مشورہ دیتے رہتے ہیں۔
