ممنوعہ فنڈنگ کیس کا فیصلہ، پنجاب اسمبلی میں خراجِ تحسین کی قرارداد جمع

لاہور: پاکستان تحریکِ انصاف کے خلاف ممنوعہ فنڈنگ کیس کا فیصلہ سامنے آنے کے بعد پنجاب اسمبلی میں چیف الیکشن کمشنر کو خراجِ تحسین پیش کرنے کیلئے قرارداد جمع کرائی گئی ہے۔

تفصیلات کے مطابق الیکشن کمیشن کے پی ٹی آئی مخالف فیصلے کے حق میں قرارداد ن لیگ کی رکنِ اسمبلی حنا پرویز بٹ، سعدیہ تیمور اور سمیرا کومل نے جمع کرائی جس میں کمیشن کے 8سال بعد آنے والے فیصلے کی تعریف کی گئی ہے۔

یہ بھی پڑھیں:

عمران خان اداروں کو بلیک میل کرنے کی کوشش کر رہے ہیں۔فضل الرحمان

واضح رہے کہ پنجاب کے 14 اضلاع میں گزشتہ ماہ منعقدہ انتخابات میں تحریکِ انصاف نے 20 میں سے 14 نشستیں اپنے نام کی تھیں جس کے بعد پرویز الٰہی کو وزیر اعلیٰ پنجاب بنایا گیا۔ ایسے میں ن لیگ کیلئے قرارداد کی منظوری بڑا چیلنج ثابت ہوسکتا ہے۔

چیف الیکشن کمشنر کو تحریک انصاف کی ممنوعہ فنڈنگ کا بغیر خوف کے حقائق پر مبنی فیصلہ سنانے پر خراج تحسین پیش کرنے کی قرارداد پنجاب اسمبلی میں جمع کرادی pic.twitter.com/4qY9LPB1ce

— Hina Parvez Butt (@hinaparvezbutt) August 2, 2022

پنجاب اسمبلی میں جمع کرائی گئی قرارداد میں کہا گیا ہے کہ ایوان چیف الیکشن کمشنر کو پی ٹی آئی کی فارن فنڈنگ کا حقائق کے مطابق فیصلہ سنانے پر خراجِ تحسین پیش کرتا ہے۔ چیف الیکشن کمشنر سکندر سلطان راجہ نے تحریکِ انصاف کا دباؤ مسترد کردیا۔

پنجاب اسمبلی میں جمع کرائی گئی قرارداد میں کہا گیا ہے کہ سابق وزیر اعظم عمران خان نے چیف الیکشن کمشنر پر گھٹیا الزامات لگائے۔ اس کے باوجود چیف الیکشن کمشنر نے صبر و تحمل کے ساتھ اپنے پیشہ ورانہ فرائض سرانجام دئیے۔ کمیشن فیصلے کے بعد عمران خان صادق و امین نہیں رہے۔

قرارداد میں کہا گیا کہ عمران خان الیکشن کمیشن سے ممنوعہ فنڈنگ کیس کے متعلق غلط بیانی کے بعد آئین کی دفعہ 62 کی خلاف ورزی کے مرتکب ہوئے ہیں۔ قرارداد کا مسودہ حنا پرویز بٹ نے سماجی رابطے کی ویب سائٹ ٹوئٹر پر شیئر کردیا۔