گوگل نیوز پر ہمیں فالو کریںکراچی: مولانا عادل خان پر قاتلانہ حملے کی ابتدائی رپورٹ وزیرِ اعلیٰ سندھ کو پیش کردی گئی ہے جبکہ واقعے کی سی سی ٹی وی فوٹیج بھی سامنے آگئی۔
تفصیلات کے مطابق جامعہ فاروقیہ کے مہتمم مولانا عادل خان کو ڈرائیور سمیت گزشتہ شب گولیاں برسا کر قتل کیا گیا، واقعے کی سی سی ٹی وی فوٹیج میں فائرنگ کے بعد ملزمان کو بھاگتے ہوئے دیکھا جاسکتا ہے۔
ٹارگٹ کلنگ کے واقعے پر کراچی پولیس چیف کا کہنا ہے کہ مولانا عادل خان پر موٹر سائیکل سوار ملزمان نے گولیاں برسائیں۔ جائے وقوعہ سے گولیوں کے 5 خول برآمد ہوئے ہیں۔
معروف عالمِ دین مولانا عادل خان پر فائرنگ کے واقعے کی ابتدائی رپورٹ وزیرِ اعلیٰ سندھ کو پیش کردی گئی ہے۔ رپورٹ کے مطابق فائرنگ کے واقعے سے قبل مولانا عادل خان کا ایک ساتھی خریداری کیلئے گاڑی سے اترا جس کے دوران گولیاں برسائی گئیں۔
ترجمان لیاقت نیشنل ہسپتال کے مطابق مولانا عادل خان کو 2 گولیاں لگیں۔ گورنر سندھ عمران اسماعیل اور وزیرِ اعلیٰ سندھ مراد علی شاہ نے پولیس اور قانون نافذ کرنے والے اداروں کو قاتلوں کو فوری طور پر گرفتار کرنے کا حکم دیا ہے۔
یاد رہے کہ اِس سے قبل مولاعادل خان کی نمازِ جنازہ جامعہ فاروقیہ کراچی میں ادا کردی گئی، ان کے ساتھ جاں بحق ساتھی مقصود کی نمازِ جنازہ بھی مولانا عادل خان کے ساتھ ہی ادا کی گئی۔
گزشتہ شب کراچی میں دہشت گردی کے واقعے میں جاں بحق ہونے والے جامعہ فاروقیہ کے مہتمم مولانا عادل خان کی نمازِ جنازہ آج ان کے بڑے بھائی مولانا عبید اللہ خالد نے پڑھائی۔
مزید پڑھیں: مولانا عادل خان کی نمازِ جنازہ جامعہ فاروقیہ کراچی میں ادا
