عمران خان نے جسٹس قاضی فائز عیسیٰ کیخلاف غلط ریفرنس کا اعتراف کرلیا

اسلام آباد:سابق وزیراعظم عمران خان نے سپریم کورٹ کے جسٹس قاضی فائز عیسیٰ کی برطرفی کے لیے صدارتی ریفرنس دائر کرنے کی غلطی کااعتراف کرلیا۔

انگریزی اخبار ٹربیون کے مطابق سابق وزیر اعظم نے منگل کو انصاف لائرز فورم کے اراکین سے ملاقات کے دوران اپنی غلطی کا اعتراف کیا۔

اجلاس کا مقصد موجودہ حالات میں پارٹی کے قانونی ونگ کو فعال کرنا تھا،اجلاس کے متعدد شرکاء نے ایکسپریس ٹربیون کو تصدیق کرتے ہوئے بتایا کہ سابق وزیراعظم نے تسلیم کیا کہ جسٹس عیسیٰ کے خلاف صدارتی ریفرنس دائر کرنا ایک غلطی تھی کیونکہ اس وقت کے متعلقہ حکام نے ان کی حکومت کو کیس کے حقائق سے گمراہ کیا تھا۔

مزید پڑھیں:پاکستان اسلامی جمہوریہ، یہاں اسلام کے مطابق کچھ نہیں ہورہا۔ جسٹس فائز عیسیٰ

عمران گزشتہ دو سالوں سے سپریم کورٹ کے جج قاضی فائز عیسیٰ کے خلاف ریفرنس کی پیروی میں دلچسپی نہیں رکھتے تھے۔ معلوم ہوا ہے کہ سابق اٹارنی جنرل برائے پاکستان خالد جاوید خان نے انہیں باور کرایا تھا کہ جسٹس عیسیٰ ایک ایماندار جج ہیں اور انہیں اس کیس میں گمراہ کیا گیا۔

پی ٹی آئی کے ایک سینئر وکیل نے کہا کہ عمران خان کا خیال ہے کہ جسٹس عیسیٰ کے خلاف ریفرنس دائر کرنے سے اعلیٰ عدلیہ کا ایک طبقہ پارٹی سے ناراض ہے تاہم سینئر وکلاء کا کہنا ہے کہ عمران خان ملک کے چیف ایگزیکٹو ہونے کی وجہ سے بری نہیں ہوسکتے کیونکہ ان کی ہدایت پر ریفرنس دائر کیا گیا تھا۔