جنسی زیادتی کا شکار 10 سالہ فرشتہ کے قاتل کو سزائے موت سنادی گئی

اسلام آباد: ڈسٹرکٹ اینڈ سیشن کورٹ نے 10 سالہ فرشتہ کے قاتل کو سزائے موت کا حکم دے دیا اور 10 لاکھ روپے کا جرمانہ بھی عائد کردیا۔

اسلام آباد ڈسٹرکٹ اینڈ سیشن کورٹ میں 10 سالہ فرشتہ قتل کیس کی سماعت ہوئی، سماعت کے دوران ایڈیشنل سیشن جج ہمایوں دلاورنے فرشتہ قتل کیس کا فیصلہ سنایا۔

سماعت کے دوران عدالت نے ملزم نثار کو جرم ثابت ہونے پر سزائے موت کا حکم دے دیا اور ملزم پر 10 لاکھ روپے کا جرمانہ بھی عائد کردیا۔

یاد رہے کہ سال 2019 میں ضلع مہمند سے تعلق رکھنے والی فرشتہ نامی 10 سالہ بچی کو زیادتی کے بعد قتل کردیا گیا تھا، 10 سالہ فرشتہ کو اغوا کیا گیا، جس کا مقدمہ والدین نے درج کروانے کی کوشش کی لیکن پولیس نے بد ترین غفلت کا مظاہرہ کیا، بعد ازاں ملزمان نے فرشتہ کی لاش قریبی جنگل میں پھینک دی تھی۔

یہ بھی پڑھیں: دُعا زہرا کی پنجاب میں موجودگی کا انکشاف، پولیس سیالکوٹ پہنچ گئی

اس کیس کے حوالے سے اسپتال کی انتظامیہ نے بھی پوسٹ مارٹم کرنے سے انکار کردیا تھا اور مؤقف اختیار کیا تھا کہ ساڑھے 6 بجے کے بعد وقت ختم ہو جاتا ہے تاہم بعد میں کیس میں تین ملزمان کو گرفتار کرلیا گیا تھا۔

بعدازاں آئی جی نے غفلت برتنے پر تھانہ شہزاد ٹاؤن کے ایس ایچ او کو معطل کرتے ہوئے جوڈیشل انکوائری کے لیے کمیشن قائم کیا گیا۔ رپورٹ کے مطابق فرشتہ کے والد نے پہلی بار 15 مئی کو گم شدگی کی رپورٹ دی، کیس کی باضابطہ ایف آئی آر 19 مئی کو درج کی گئی، بچی کی میت 20 مئی کو برآمد ہوئی۔