وزیر داخلہ رانا ثناء اللہ کیخلاف منشیات برآمدگی کیس میں اہم پیشرفت

  لاہور: عدالت نے منشیات برآمدگی کیس میں وزیر داخلہ رانا ثنااللہ کو 25 جون کو فرد جرم کیلئے طلب کرلیا۔

تفصیلات کے مطابق لاہور کی انسداد منشیات کی عدالت نے گزشتہ سماعت کا تحریری حکم نامہ جاری کردیا۔  منشیات برآمدگی کیس میں 25 جون کو فرد جرم عائد کی جائے گی۔ عدالت نے رانا ثنا اللہ کو فرد جرم کے لیے طلب کرلیا۔

وزیرداخلہ رانا ثناء اللہ کی پراپرٹی اور بنک اکاؤنٹس کھولنے کی درخواست پر اے این ایف سے جواب طلب کر لیا گیا۔ رانا ثناءاللہ کی مستقل حاضری معافی کی درخواست پر وکلاء آئندہ دلائل دیں۔

یہ بھی پڑھیں: برطانوی پاکستانی خاتون مہم جو شائستہ گوہر ہاؤس آف لارڈز میں مقرر

تحریری حکم نامے کے مطابق شریک ملزمان نے فرد جرم عائد نہ کرنے کی درخواستوں کو واپس لے لیا۔ عدالت نے درخواستوں کو واپس لینے کی بنیاد پر مسترد کردیا۔

منشیات برآمدگی کیس کی عدالتی کارروائی کے دوران وزیر داخلہ کی عدم حاضری پر اُن کے وکیل نے مؤقف دیا کہ وفاقی وزیر داخلہ ہونے کے باعث انہیں اسلام آباد میں جلدی جانا ہے اس لیے وہ پیش نہیں ہوسکے۔

واضح رہے کہ رانا ثناء اللہ کے خلاف اے این ایف حکام نے 15 کلو منشیات برآمدگی کا چالان جمع کروا رکھا ہے۔