گوگل نیوز پر ہمیں فالو کریںراولپنڈی کرکٹ اسٹیڈیم میں آج آئی سی سی چیمپئنز ٹرافی کے گروپ اے کے تحت پاکستان اور بنگلہ دیش کے درمیان میچ شیڈول ہے تاہم بارش کے امکانات کے باعث یہ میچ متاثر ہوسکتا ہے۔
میچ پاکستانی وقت کے مطابق دوپہر 2 بجے شروع ہونا ہے لیکن محکمہ موسمیات نے راولپنڈی میں آج بارش کی پیش گوئی کی ہے جو میچ کے انعقاد پر اثر ڈال سکتی ہے۔
موسمیاتی ویب سائٹ “ایکیو ویدر” کے مطابق دوپہر 2 بجے بارش کے 75 فیصد جبکہ 3 بجے 68 فیصد امکانات ہیں۔
بدھ کی رات اسلام آباد اور راولپنڈی میں موسلا دھار بارش ہوئی جس کے نتیجے میں گراؤنڈ گیلا ہونے کا امکان ہے۔
بنگلہ دیشی ٹیم نے بھی بدھ کے روز غیر موزوں گراؤنڈ کنڈیشنز کے باعث اپنا پریکٹس سیشن منسوخ کر دیا تھا تاہم یہ میچ دونوں ٹیموں کے لیے محض رسمی نوعیت کا ہوگا کیونکہ وہ پہلے ہی ٹورنامنٹ سے باہر ہوچکی ہیں۔
پاکستان اور بنگلہ دیش دونوں ٹیمیں ایونٹ میں ناقص کارکردگی کے باعث شدید تنقید کی زد میں ہیں۔ سابق کھلاڑیوں اور عوام نے نہ صرف کھلاڑیوں بلکہ پاکستان کرکٹ ٹیم کی مینجمنٹ اور سلیکشن کمیٹی کو بھی آڑے ہاتھوں لیا ہے۔
گزشتہ روز ایک پریس کانفرنس میں چیف سلیکٹر عاقب جاوید نے کہاکہ ٹیم میں شامل کوئی بھی کھلاڑی بغیر کارکردگی کے منتخب نہیں کیا گیا۔ ہمارا مقصد بہترین ممکنہ ٹیم تشکیل دینا تھا۔
